Boric pídelle ao próximo goberno de Kast que lle dea "continuidade" ás políticas de Estado

O presidente saínte de Chile, Gabriel Boric, pediu este luns a quen será o seu sucesor, o ultradereitista José Antonio Kast, que a próxima Administración respecte os dereitos adquiridos e continúe "con moitas das políticas iniciadas e acordadas nestes anos, e que son tarefas de Estado".

"A implementación da reforma de pensións, de permisos sectoriais, a instalación do Ministerio de Seguridade Pública, o proceso de vacinación que adiantamos a marzo, a lei integral contra a violencia á muller, as oficinas locais da nenez, os servizos locais de educación publica", detallou o actual mandatario desde o palacio presidencial.

"Hai moitas políticas que, independente de quen goberne, teñen que seguir funcionando, iso conversamos este luns nun diálogo cordial, respectuoso, institucional e con altura de miras", subliñou Boric, que destacou o "clima positivo" en que se desenvolveu o encontro entre ambos.

"É importante ter en conta que máis aló das distintas visións políticas que ambos representamos, existe unha continuidade de Estado, das súas institucións, do servizo publico e de orde democrática", apuntou.

Kast, que gañou as eleccións cun 58,1 %, acudiu á Moneda acompañado pola súa esposa, María Pía Adriasola, quen ocupará o cargo de primeira dama do que Boric prescindiu. O político ultradereitista converterase no primeiro pinochetista en chegar ao poder tras a fin da ditadura hai 35 anos, tras impoñerse nas 16 rexións do país e pechar a segunda vitoria en segunda volta máis ampla desde o retorno á democracia (a primeira foi a vitoria da socialista Michelle Bachelet contra a conservadora Evelyn Matthei en 2013).