Biden visita por sorpresa Kíiv e anuncia 500 millóns de dólares en axuda

O presidente dos Estados Unidos, Joe Biden, anunciou este luns durante a súa visita sorpresa a Kíiv, 500 millóns de dólares en axuda adicional a Ucraína. Tamén adiantou que esta semana anunciará máis sancións contra Rusia.

Biden fixo ese anuncio nunhas declaracións xunto ao seu homólogo ucraíno, Volodímir Zelenski, no Palacio Mariinsky da capital. O mandatario estadounidense explicou que o novo paquete de axuda incluirá máis equipo militar, ademais de municións de artillería, obuses e mísiles Javelin, un arma portátil deseñada para destruir tanques e outros vehículos pesados.

Pero Biden non anunciou o envío a Ucraína de novos equipos militares, como os avións de combate F-16, que Zelenski reclama para defenderse de Rusia.

"Un ano despois, Kíiv segue de pé. Ucraína segue de pé e a democracia segue de pé", proclamou o presidente estadounidense.

Biden dixo que non quería que houbera ningunha dúbida sobre o apoio "inquebrantable" dos Estados Unidos coa democracia, a soberanía e a integridade territorial de Ucraína e que, por esa razón, se desplazara este luns á capital do país. Zelenski agradeceulle a súa presenza en Kíiv.

Visita sorpresa de Biden

A Casa Branca non adiantara a visita de Biden a Kíiv por motivos de seguridade e non informou dela ata que xa estaba en curso. É a primeira vez que o presidente dos Estados Unidos visita Kíiv desde o inicio da guerra.

A primeira dama, Jill Biden, si visitara a cidade de Uzhhorod, na fronteira con Eslovaquia, o pasado 8 de maio coincidindo coa celebración do Día da Nai en Ucraína.