Botazzi, cocreadora da vacina libre de patentes, defende en Santiago a importancia de compartir coñecementos
Botazzi, cocreadora da vacina libre de patentes, defende en Santiago a importancia de compartir coñecementos
A súa vacina contra a covid, de baixo custo, efectiva, segura e libre está sendo fabricada por centos de millóns de doses para inmunizar os cidadáns dos países pobres
María Elena Botazzi foi nomeada ao premio Nobel da Paz precisamente por esta vacina contra a covid que está permitindo reducir a brecha de inmunidade dos países en vías de desenvolvemento e camiñar cara á equidade no acceso á saúde.
En Galicia, unha das rexións do mundo con maior taxa de vacinación -un 98 % da poboación coa terceira dose- ponse hoxe o foco noutras latitudes con moitas dificultades de acceso ás vacinas. En Ruanda, por exemplo, non está vacinado aínda nin o 5 % da poboación.
As vacinas que se consumen no primeiro mundo teñen un prezo duns 20 euros por pauta e reportáronlles beneficios milmillonarios ás grandes farmacéuticas.
O 72 % acapáranos Pfizer e a súa filial xermana BioNtech. Pero as vacinas de ARN teñen unha tecnoloxía difícil de replicar, e os países pobres teñen dificultades de acceso.
"A calquera concepto novo lévalle tempo entenderse, e transferirse, e por iso o grande erro mundial foi non balancear ese concepto de como se poden desenvolver vacinas con innovación, pero tamén coa ciencia máis tradicional usando conceptos xa coñecidos", explica María Elena Botazzi, cocreadora da vacina Corbevax, libre de patentes.
Botazzi, é codirectora do centro de Houston que logrou a vacina tras dez anos de investigación sobre os coronavirus Sars e Mers, e de coñecemento doutras vacinas de proteínas recombiantes, como a da hepatipe B.
Agora o antídoto libre de patentes está xa replicándose por millóns: a India xa chegou a escalar a produción a cen millóns de doses mensualmente. Tamén se produce en Botsuana e Indonesia, onde poderán evitar decenas de miles de mortes, e por iso, a aposta é por compartir.
