Austria converte a casa natal de Hitler nunha comisaría para borrar a súa simboloxía nazi

A casa onde naceu o ditador nazi Adolf Hitler (1889-1945) reabriu este mércores convertida nunha comisaría de policía, coa que Austria busca evitar que o edificio se converta nun lugar de peregrinación para quen glorifica o nazismo.

O edificio situado en Braunau am Inn, preto da fronteira con Alemaña, alberga desde agora o novo Centro Policial da cidade e dependencias da Academia de Seguridade, onde tamén se impartirán cursos de formación para axentes, incluídos contidos relacionados cos dereitos humanos.

Con este novo uso, o Goberno austríaco pretende que un edificio asociado ao nacemento de Hitler, o ditador que levou o mundo á Segunda Guerra Mundial e foi responsable do Holocausto, quede integrado nas estruturas dun Estado democrático.

"A policía de hoxe é exactamente o contrario do simbolismo que está asociado a este lugar. Representa a democracia e o Estado de dereito, a liberdade e a dignidade humana, así como a súa defensa incondicional fronte a todos aqueles que as ameazan, contra calquera forma de extremismo e totalitarismo", dixo o ministro austríaco do Interior, Gerhard Karner, durante a cerimonia de inauguración da comisaria.

A remodelación transformou por completo o edificio, substituíndo a súa antiga fachada amarela por outra branca e funcional, inspirada no seu aspecto orixinal do século XVII.

O que había no interior do inmoble está nun lugar secreto

Todo o material retirado durante as obras foi levado a un lugar secreto para evitar que grupos neonazis puidesen utilizalo como reliquias para glorificar a Hitler.

Coa apertura dunha comisaría, as autoridades pretenden impedir que grupos neonazis acudan ao lugar para glorificar a Hitler, algo que ademais é un delito en Austria, un país anexionado pola Alemaña nazi entre 1938 e 1945.

Hitler naceu nesta casa o 20 de abril de 1889, aínda que só viviu alí os seus primeiros tres anos de vida antes de que a súa familia abandonase Braunau, unha localidade que hoxe ten 17.500 habitantes e está situada a poucos quilómetros da fronteira con Alemaña.

Unha atracción para nazis e neonazis

Xa desde os anos 1930 houbo en Braunau reunións de nazis e despois da Segunda Guerra Mundial de grupos neonazis.

O semanario alemán Der Spiegel informou a semana pasada de que, pouco antes da reapertura do edificio, uns hackers manipularon Google Maps para substituír a dirección da casa, Salzburger Vorstadt 15, polo número 88, un código utilizado por neonazis para referirse a "Heil Hitler", dado que o H é a oitava letra do abecedario.

A casa foi desde hai décadas un imán para neonazis que querían glorificar a Hitler e fotografaban o edificio, levaban pedras ou anacos da fachada como recordo e depositaban flores.

En 2024, catro cidadáns alemáns foron sorprendidos colocando rosas brancas nas fiestras da casa e posando para fotografías, entre eles unha muller que realizou o saúdo nazi.

Sobre a entrada principal loce agora o logotipo da Policía austríaca e fronte ao edificio mantense o monumento conmemorativo instalado en 1989, que lembra ás vítimas do nazismo coa inscrición "Pola paz, a liberdade e a democracia. Nunca máis fascismo. Millóns de mortos advírteno".

Expertos recomendaron darlle un uso administrativo

A inauguración da comisaría pon fin a décadas de debate sobre o uso dun edificio cargado de simbolismo e que algúns intelectuais e historiadores austríacos sinalaron como exemplo das dificultades do país para afrontar a memoria do seu pasado nazi.

Desde 1972, o Estado austríaco alugou o edificio co obxectivo de impedir que puidese transformarse nun lugar de exaltación do ditador nazi.

A casa permaneceu baleira desde 2011, cando abandonou o inmoble unha oenegué que durante anos utilizara o espazo para atender persoas con discapacidade intelectual.

Tras varios intentos errados de alcanzar un acordo de compra coa antiga propietaria, o Estado expropiou a vivenda en 2016.

Unha comisión de expertos creada para decidir o seu futuro recomendou darlle un uso social, benéfico ou administrativo, ao considerar que convertela nun museo podería aumentar aínda máis o seu atractivo para grupos extremistas, mentres que a súa demolición supoñería borrar unha parte incómoda do pasado.

As autoridades optaron por darlle un uso policial, unha decisión anunciada en 2019 e que, de paso, desalienta calquera acto de apoloxía do nazismo.

O custo do proxecto, que nun principio se calculou nuns cinco millóns de euros, elevouse ata preto de 20 millóns debido ao atraso das obras.