Así serán os contratos formativos

O Goberno aprobou o desenvolvemento regulamentario dos novos contratos formativos, xa previstos na reforma laboral de 2021, establecendo unha remuneración mínima conforme ao SMI e limitando o número destes traballadores en prácticas en función do tamaño da empresa.

O Consello de Ministros aprobou, a proposta do Ministerio de Traballo e Economía Social, o real decreto polo que se desenvolve o réxime do contrato formativo, incluído na reforma laboral que cumpre agora catro anos, para garantir os dereitos das persoas en prácticas laborais.

A vicepresidenta segunda e ministra de Traballo, Yolanda Díaz, explicou que, xunto co Estatuto do Bolseiro, estes contratos buscan garantir unha formación de calidade "primando a erradicación das prácticas abusivas que se producen en materia de formación".

Neste sentido, lembrou que ata a data asináronse 944.547 prácticas non remuneradas e só 54.987 contratos formativos, unha cifra esta última que "non é nada" porque "o que fan as empresas e algúns centros públicos é acudir á vía fraudulenta".

"Acabáronse as fraudes no noso país. Non podemos ter man de obra gratis cando a xente está a formarse", deixou claro.

A norma regula dúas modalidades de contratos formativos: os de formación en alternancia -que compatibiliza os procesos formativos coa actividade laboral retribuída- e os dirixidos á obtención da práctica profesional, unha vez terminada a formación habilitante e en función dos estudos correspondentes.

A norma fixa límites en salarios, xornada e número de contratos. Así, recolle que a retribución non poderá ser en ningún caso inferior ao SMI e establecerase por convenio, proporcionalmente ao tempo de traballo efectivo segundo o convenio colectivo.

Respecto á xornada laboral, o tempo de traballo non poderá ser superior ao 65 % da xornada máxima durante o primeiro ano, nin ao 85 % durante o segundo -garantindo a compatibilidade coa vida académica-, e sen posibilidade de facer horas extraordinarias, traballo nocturno ou a quendas.

"Non se poden realizar horas extra nin retribuír 400 euros", deixou claro Díaz, quen lembrou que estes contratos deben ter un contrato expreso por escrito con dereitos e cunha dobre titoría, unha do centro formativo e outro da persoa responsable nas empresas.

A norma fixa un número máximo de contratos formativos vixentes ao mesmo tempo en cada centro de traballo, de forma que non poderá haber máis de 3 contratos nas empresas de ata 10 traballadores, explica o Ministerio de Traballo nun comunicado.

Naquelas compañías de entre 11 e 30 empregados, non poderá haber máis de 7 contratos; para aquelas de entre 31 e 50 traballadores non poderán superar os 10 contratos; e para as de máis de 50 persoas, estes contratados non poderán superar o 20 % do persoal.

As empresas deberán subscribir convenios de colaboración para poder celebrar contratos de formación e un plan formativo individual.

Cada persoa poderá titorizar na empresa a un máximo de 5 persoas traballadoras con contratos formativos simultaneamente, ou de 3 en centros de traballo de menos de 30 persoas traballadoras.

Así mesmo, fíxase o dereito de información da representación legal dos traballadores e establece que a actividade realizada deberá estar directamente relacionada coa actividade formativa que xustifica a contratación laboral.

Os contratos formativos desenvolverán garantías laborais como as cotizacións ao desemprego e ao Fondo de Garantía Salarial (FOGASA), entre outros.