As oenegués de Pontevedra están nunha situación crítica pola falta de voluntarios

Horas críticas para asociacións e entidades sen ánimo de lucro e de inclusión social. Faltan voluntarios. Iso está a frear o seu traballo para atender os que máis o necesitan, nun momento en que están a piques de comezar a campaña de final de ano, que é unha en que máis axuda e achegas reciben. 

Á tendencia descendente do voluntariado dos últimos anos veuse sumar a incidencia da pandemia, que fai que as persoas de máis idade queden na casa e as incorporacións sexan escasas. Agora que queren retomar o groso das actividades non poden.

José Luis Doval, responsable do Banco de Alimentos de Pontevedra, explica que "hai escaseza de voluntarios, loxicamente estamos facendo un chamamento a todos os que temos e máis ou menos van respondendo. Esperamos cubrir as necesidades que temos. Sobre todo, onde máis problema hai é en Sanxenxo, o que é Pontevedra imos cubrindo".

Santiago Barros Costas, da Asociación Boa Vida, sostén que están "notando que non hai esa afluencia" que lles gustaría e que "estamos pelexando para mover a conciencia da xente e apelar a ela para que nos apoien tanto a nós como a outras asociacións que tamén teñen este problema".

Os voluntarios son fundamentais para desenvolver a súa actividade e poder axudar a xente con poucos recursos. As súas tarefas son múltiples e indispensables. Por exemplo, na Asociación Boa Vida acompañan persoas en exclusión social para que aprendan a facer tarefas, como sementar verdura nunha horta que teñen e outras iniciativas de integración social.

"Hai voluntariado nas tendas, temos dúas tendas de segunda man. E tamén na clasificación de roupa porque recibimos moita roupa, axudan a clasificala", di Santiago Barros Costas, da Asociación Boa Vida.

José Luis Doval, responsable do Banco de Alimentos de Pontevedra explica que "ordenan e clasifican os alimentos para despois entregalos as distintas oenegués. De feito, esta furgoneta que vedes aquí marcha agora cargada. Iso é o que fan os voluntarios de aquí".

Agora que chega a campaña de final de ano, entidades coma o banco de alimentos de Pontevedra precisan de 170 persoas, porque a necesidade de voluntarios é urxente.