As inundacións en Tailandia deixan 8 mortos e case 2 millóns de afectados
As inundacións afectan a 27 provincias, incluída a capital, Bangkok
Ducias de persoas percorren as rúas inundadas de Bangkok (Reuters/Athit Perawongmetha)
Oito persoas faleceron e 1,8 millóns están afectadas polas fortes choivas e inundacións en case unha trintena de provincias de Tailandia, incluído Bangkok, que continúa parcialmente anegado e con distritos illados.
Un total de 1.793.887 persoas víronse afectadas, incluídas 163.280 en Bangkok, por este temporal de fortes precipitacións que afecta o país desde mediados de mes, apunta o informe.
Na capital, onde se habilitaron 233 centros temporais de evacuación, as intensas precipitacións continúan este luns de xeito intermitente.
As autoridades manteñen o estado de desastre decretado o sábado nos 50 distritos que compoñen Bangkok, habitada por uns 9 millóns de persoas no seu termo municipal e máis de 15 millóns na súa área metropolitana.
O primeiro ministro, Anutin Charnvirakul, decretou o luns e o martes como non laborables para os traballadores públicos en Bangkok e provincias anexas co obxectivo de evitar desprazamentos cara á capital e solicitou colaboración a bancos e compañías privadas.
Algúns colexios da metrópole tamén pecharon as súas portas.
Anutin, quen suspendeu a súa visita ao Reino Unido para regresar ao país, encabezou este luns unha reunión de emerxencia para abordar a situación e valorar posibles axudas para os afectados.
O primeiro ministro apremou os organismos oficiais a drenaren a auga das zonas de Bangkok o máis rápido posible e acelerar a repartición de asistencia para as familias afectadas, apunta un comunicado publicado no portal do Goberno.
Grupos de voluntarios tamén se uniron á repartición de axuda.
Bangkok é especialmente susceptible de sufrir inundacións ante fortes precipitacións debido a factores como a súa localización sobre o delta do río Chao Phraya, a uns 1,5 metros sobre o nivel do mar; a histórica sobreexplotación de acuíferos subterráneos, que contribuíu ao afundimento da metrópole, ou a súa extensa rede de canles.
As inundacións afectan a 27 provincias, incluída a capital, e rexións do centro, como Phitsanulok e Ayutthaya, e ao leste do país, como Chon Buri e Buriram.
Tailandia sufriu en 2011 unhas das peores inundacións da súa historia, provocada por unha temporada de monzóns excepcionalmente chuviosa e varias tormentas tropicais, con máis de 800 mortos e de 13 millóns de afectados, segundo o Banco Mundial.
