As familias do Pitanxo e a Xunta esíxenlle ao Goberno que se baixe ao barco

As familias dos 21 mortos no naufraxio hai cinco meses do Villa de Pitanxo nas augas de Terra Nova no Canadá e a Xunta coincidiron este sábado, día en que se reuniron en Marín, na necesidade de que o Goberno poña medios para baixar ao pecio, tratar de recabar probas que esclarezan o accidente marítimo e ver se hai algún corpo dos doce desaparecidos.

Alfonso Rueda asegurou que a Xunta non vai escatimar recursos para colaborar en caso de que o executivo de Pedro Sánchez teña en conta as "reiteradas peticións" dos familiares dos tripulantes que faleceron en augas canadenses.

Nun comunicado enviado despois da cita, Rueda insiste en que é necesario !aclarar" o ocorrido na traxedia do 15 de febreiro. Comprometeuse de novo a trasladarlle esa urxencia a pedro Sánchez cando se produza o encontro institucional entre os dous.

O xefe do executivo galego lamentou que pasados dous meses da súa toma de posesión aínda non haxa data para esa cita bilateral pero, cando se produza, comprometeuse a entregar a carta que este 16 de xullo lle deron os familiares do Villa de Pitanxo na que trasladan por escrito a reivindicación común por escrito.

A voceira dos familiares, María Xosé de Pazo agradeceu a Rueda que sempre os reciba, como sucedía co seu antecesor, o líder do PP, Alberto Núñez Feijóo. De Pazo insistiu en que non entenden que o presidente do Goberno non os reciba para escoitar as súas reclamacións.

O presidente da Xunta reuniuse coas familias tras acompañar ao rei Filipe VI na entrega dos despachos na escola Naval Militar de Marín.