As cifras da covid amosan unha boa evolución na última semana en Galicia

Os datos sobre a situación da covid en Galicia amosan unha mellora da situación epidemiolóxica. Descenden os pacientes hospitalizados, cunha lixeira suba nas UCI, e baixa tamén a incidencia acumulada a 15 días nos maiores de 60 anos.

Nos últimos días a situación hospitalaria mellorou en todas as áreas sanitarias. Comezamos a semana por enriba dos 600 ingresados e hoxe hai 465 en total, unha cifra que non se daba desde primeiros de abril. 

O número de pacientes en planta é o que máis baixou nestes últimos días. Hai 444 persoais ingresadas, e só a área da Coruña supera o cento de pacientes. Nas UCI, os enfermos críticos aumentaron nestas últimas horas ata os 21. Vigo é a única área que non ten pacientes coa covid nas unidades de coidados intensivos. 

A incidencia acumulada nos últimos 14 días en maiores de 60 anos descende notablemente con respecto á semana pasada. O informe do Ministerio deste venres notificaba 787 casos por cada 100.000 habitantes desta idade. Hai unha semana superábanse os 1.000. 

A cifra de persoas con infección activa segue baixando tamén, con 9.701 casos computados. Nas últimas horas faleceron catro persoas contaxiadas de entre 63 e 97 anos.