Artemis II vai xa camiño da Lúa "impulsado polas esperanzas da humanidade para o futuro"

A NASA confirmou que a manobra de inxección translunar da misión Artemis II completouse con éxito, poñendo á tripulación en roteiro cara á Lúa, a pesar de rexistrar incidentes menores que non comprometen o desenvolvemento do voo.

A axencia recoñeceu que durante as primeiras fases da operación da nave espacial Orión rexistráronse axustes técnicos e unha breve interrupción en comunicacións, xa resolta, aínda que insistiu en que non hai preocupacións actuais.

"Atopamos varios aspectos no camiño, pero ningún representa unha preocupación hoxe por hoxe", sinalou en conferencia de prensa Howard Hu, o director do programa Orion.

As autoridades destacaron que a manobra, de cinco minutos e 52 segundos, foi executada "de forma impecable" polo equipo de control de voo en Houston e marca o último gran acendido de motores da misión, tras o cal a nave continuará a súa traxectoria impulsada polas leis da mecánica orbital arredor da Lúa e de regreso á Terra.

Así mesmo, subliñou que a tripulación se atopa en bo estado e que os sistemas da cápsula funcionan segundo o previsto.

O canadense Jeremy Hansen, asegura que se senten "moi ben" de camiño á Lúa e afirma que son "as esperanzas da humanidade para o futuro" as que os "impulsan agora" nesta viaxe; pouco antes, Christina Koch dicía que non abandonan a Terra, elíxena.

Durante as primeiras xornadas de voo, os astronautas realizaron diversas probas a bordo, incluíndo a verificación de sistemas clave como a subministración de auga, o sanitario e os dispositivos de eliminación de dióxido de carbono, alén de manobras de control manual que achegarán datos para futuras misións.

"Este segue sendo un voo de proba (…) imos seguir obtendo información clave cada día para aprender a operar esta nave na contorna real de espazo", puntualizou Hu.

Durante o seu paso pola cara oculta do satélite, previsto para o 6 de abril, os tripulantes da Orión atoparanse a máis de 400.000 quilómetros de distancia do noso planeta e superarán a marca establecida polo Apolo 13 para unha misión que transporta seres humanos.

Artemis II ten o obxectivo de enviar astronautas á órbita lunar por primeira vez desde que os integrantes do Apolo 17 abandonasen o satélite en 1972.

A tripulación de Artemis II está conformada polo comandante Reid Wiseman, a especialista Christina Koch e o piloto Victor Glover, os tres da NASA, así como por Jeremy Hansen, da Axencia Espacial Canadense (CSA).

O programa Artemis busca establecer unha presenza permanente dos Estados Unidos no satélite natural cunha base, alén de sentar as condicións para a exploración de Marte.