Arrinca a vendima máis madrugadora de Valdeorras

Desde primeira hora da mañá comezan os traballos nos viñedos de Córgomo, en Vilamartín, aproveitando as horas máis frescas do día. Nunca antes empezara a vendima en Valdeorras na segunda semana de agosto.

"É a vendima máis temperá da nosa historia e é unha historia de catro xeracións dedicadas á agricultura. É un fito e para nós é un reto. Veu moita calor nestas últimas semanas e adiantouse o ciclo", explica Raúl Prada, da adega Valdesil.

A chuvia veu cando debía, abundante na primavera, e o verán non foi tan duro como poida parecer, o que garante a calidade da uva.

Marcos Prada Ginzo, presidente do CRDO Valdeorras: "As noites non foron tan calorosas, mantívose unha temperatura constante de 22-23 graos o que axudou a madurar a uva. Un ano extraordinario en todos os sentidos, hai cantidade, bo tempo para a vendima...".

Agardan superar a colleita do ano pasado e chegar aos oito millóns e medio de quilos.

"Imos seleccionando as uvas, apartando as que están secas ou podres", sinala unha das traballadoras.

Parte desta uva, a escollida, vaise destinar á produción de viño tostado. Unha tradición que están recuperando nesta adega e que require un secado da uva e coidados especiais.

"Agora só hai que engadir tempo, paciencia, mentres se van deshidratando os acios. Hai que vir todos os días, retirando os bagos que se van contaminando e facer medicións todas as semanas para facer o prensado no momento óptimo", explica Raúl, de Valdesil.

Este outono sacarán a primeira edición de tostado, da vendima do ano pasado.