Arquivan a denuncia contra Peinado por dicir que os escoltas de Begoña Gómez poderían axudala a fuxir

O Tribunal Superior de Xustiza de Madrid arquivou a información sumaria seguida contra o xuíz Juan Carlos Peinado pola súa afirmación no auto en que enviou a xuízo a Begoña Gómez no que indicaba que os seus escoltas poderían axudala nunha eventual fuga.

A Presidencia en funcións do Tribunal pon fin á devandita información sumaria ao concluír que as expresións cuestionadas polo Sindicato Unificado de Policía, que denunciou ao maxistrado, non constitúen falta disciplinaria de desatención ou desconsideración prevista na Lei Orgánica do Poder Xudicial.

O xuíz Juan Carlos Peinado enviou o pasado 20 de xuño a xuízo a Begoña Gómez. No auto fixou como medidas cautelares a retirada do seu pasaporte, a prohibición de saír do territorio nacional e unha comparecencia quincenal no xulgado.

Na súa resolución o maxistrado apuntaba que "non cabe dúbida" de que os axentes das Forzas e Corpos de Seguridade do Estado que forman parte da escolta de Gómez "nun momento determinado poden, ben por iniciativa propia ou seguindo ordes dos seus superiores xerárquicos, ser precisamente quen colabore na acción ou accións que se leven a cabo para facilitar esa fuga que faga imposible que a acusada se atope ao dispor da xustiza".

A información sumaria iniciouse por mor dun escrito presentado polo Sindicato de Policía ante o Consello Xeral do Poder Xudicial, informa o Tibunal Superior.

En concreto, o escrito do sindicato consideraba que determinadas referencias realizadas na resolución xudicial podían proxectar unha sospeita xeneralizada sobre os funcionarios da Policía Nacional encargados da protección de autoridades e solicitaba que se examinase a posible existencia de responsabilidade disciplinaria.

A resolución considera que neste caso non concorren os requisitos necesarios para apreciar a infracción disciplinaria. Parte de que a expresión empregada polo maxistrado pode considerarse "pouco delicada" respecto do desempeño habitual dos funcionarios dos Corpos e Forzas de Seguridade do Estado.

 A xuízo da Presidencia do Tribunal aínda que a referencia contida no auto podía resultar pouco afortunada non alcanza o grao de concreción e gravidade exixible para activar a potestade disciplinaria.