Sánchez garante que actuará con "contundencia" se aparecen probas "sólidas" da participación de Marrocos

O presidente do Goberno, Pedro Sánchez, asegurou este xoves no Congreso que "ningún organismo entregou ao Goberno evidencias de que Marrocos planificara ou organizara este episodio". De verificarse, afirma, o Goberno "actuará con contudencia".

Así o manifestou na Cámara nun pleno extraordinario convocado para explicar a actuación do Goberno tras a entrada masiva de persoas na cidade autónoma rexistrada os pasados 30 e 31 de xullo.

A comparecencia prodúcese tras as multitudinarias manifestacións celebradas en toda España en solidariedade con Ceuta e vén marcada polo informe policial que sinala a participación de xendarmes marroquís.

O presidente do Goberno pídelle explicacións ao Centro Nacional de Inmigración e Fronteiras (CENIF), despois de que os axentes non compartiran cos seus superiores o contido dun informe encargado pola xuíza da Audiencia Nacional, María Tardón, "con potenciais implicacións para a seguridade do Estado". 

Sánchez desvelou que  convocou a embaixadora marroquí o pasado 21 de agosto polas declaracións "inaceptables" de dous ministros do seu país sobre Ceuta e Melilla. Insistiu en que "hai que seguir cooperando con Marrocos, aínda que é evidente que tras o ocorrido esa cooperación ten que ser diferente".

"Os nosos axentes fixeron o correcto: ante unha ameaza souberon responder con humanidade"

O presidente do Goberno abriu a súa comparecencia reconstruíndo o ocorrido en Ceuta o día da entrada masiva de emigrantes e nas horas previas.

Segundo explicou, entre o 10 e o 25 xullo rexistráronse de media 37 entradas diarias a nado de migrantes. A partir do día 25 esta cifra disparouse ata as 194 entradas na noite do día 29, a véspera da avalancha. Horas despois, empezaron a circular en redes sociais mensaxes e vídeos animando os migrantes a cruzaren a fronteiras. A partir dese momento, segundo o presidente, empezaron a verse numerosos grupos de mozos acudindo ata Ceuta.

A maioría, 4 de cada 5, entraron a nado a través do espigón do Tarajal. Os axentes tiveron entón que actuar.

"Os nosos axentes tiveron que elixir entre garantir a estanqueidade da fronteira ou defender a vida humana. E elixiron o segundo. Fixeron o correcto, o máis intelixente e o máis valente, porque ante a ameaza souberon responder con humanidade".

Segundo o presidente, unhas 70.000 persoas cruzaron naquelas horas de forma irregular. "Foi o momento máis difícil da crise", afirma.

Tras mobilizar 250 efectivos adicionais da Garda Civil, as Forzas Armadas, embarcacións, drons, e helicópteros e, tras instalar unha barreira pneumatica no Tarajal, impediuse que se producisen máis cruzamentos nos días posteriores.

Segundo Pedro Sánchez: "En 24 horas conseguimos que regresasen 63.000 persoas, máis do 90 por cento dos que cruazaran irregularmente a fronteira a Ceuta. Unha cifra que converte esta operación nun dos retornos mais rápidos de Europa".

O presidente explicou que desde o 10 de agosto recolocáronse 3.300 migrantes e retornaron 3.668. Segundo insistiu estes retornos deben facerse con todas as garantías: "Non se pode coller un ser humano polo brazo e guindalo ao outro lado coma se fose un saco de terra.

"Ningún organismo entregou ao Goberno evidencias de que Marrocos planificase ou organizase este episodio"

O presidente do Goberno, Pedro Sánchez, reiterou este no pleno do Congreso que o Executivo non recibiu ningún informe que anticipase "nin a escala nin a probabilidade" da entrada masiva de migrantes que se rexistrou en Ceuta a finais de xullo nin tampoco da participación directa de Marrocos nesta crise.

"É absurdo pensar que o Executivo foi avisado e non fixo nada adrede. En que cabeza cabe?", explicou.

Segundo explicou, antes do 30 de xullo e nos días posteriores as autoridades marroquís actuaron con normalidade.

"A que se debeu a falta de control durante as 10 horas centrais do 30 de xullo? Todas as instancias do estado están investigando e compartiremos o que decubran con total transparencia como fixemos sempre. Se houbo inacción, deberá dirimirse".

A amplificación das loias nas redes sociais

Sánchez asegurou que o detonante da crise foi a terxiversacion en redes sociais da sentenza do Tribunal Supremo sobre as entradas por mar dos migrantes. Segundo dixo, "foi terxiversada nas redes sociais ata quedar convertida en dúas loias: que a fronteira estaba aberta e quen quen entre a nado non podería ser devolto polas autoridades españolas".

Segundo explica, houbo mafias que aproveitaron estes chamamentos para vender material e servizos de asistencia a partir do 30 de xullo e documentouse a participación de contas vinculadas ao "ecosistema ruso e proisraelí e tamén á ultradereita española e internacional, que acirraron o medo e o odio".

Sánchez anuncia que o rei visitará Ceuta e Melilla "nas próximas semanas"

O presidente do Goberno, Pedro Sánchez, afirma que é preciso actuar para mellorar a capacidade do Estado para actuar ante episodios extraordinarios coma o vivido a finais de xullo en Ceuta.

Anuncia que o Goberno inxectará 100 millóns de euros adicionais que se sumán aos 309 aprobados hai uns días polo Consello de Ministros. Confía en que as axudas comecen a pagarse o 6 de outubro.

Segundo explicou, nun mes conseguiron multiplicar por sete o número de prazas de acollida na cidade autónoma: pasouse de 500 a 3.500 e "temos recursos para duplicar este número nas próximas semanas".

O presidente avanza que o pedirá a Frontex que estableza unha presenza permanente no porto de Ceuta e que a Europol monitorice a migración irregular que sofre a cidade autónoma.

O Goberno ofrecerá a Ceuta unha cadeira permanente no Comité das Rexións, propoñerá a sú integración na Unión Aduaneira e que se lle recoñeza o estatuto de rexion ultraperiferica.

Sánchez aproveitou a súa comparecencia para anunciar que, "nas próximas semanas", o rei Filipe VI visitará as cidades autónomas de Ceuta e Melilla; será a primeira visita despois da realizada hai vinte anos polo seu pai, o rei Xoán Carlos.

Esta visita do monarca transmitirá "o compromiso absoluto do Estado" coas dúas cidades autónomas.

 

O presidente pechou a primeira parte da súa intervención asegurando que o Goberno "non renunciará nunca á soberanía de Ceuta e Melilla”, e aos ceutís díxolles: “Non nos imos esquecer de vós cando estea superada esta fase".