Arde unha nave abandonada na parroquia de Maianca, en Oleiros

O incendio dunha nave abandonada en Oleiros orixinou unha gran columna de fume negro, que chegou a verse dende A Coruña. "Víase unha fumareda enorme", di un veciño da parroquia de Maianca. "Cheiraba a plástico queimado e non se vían lapas, só fume negro". 

O incendio orixinouse pouco antes das dúas da tarde do luns. Os veciños alertaron os servizos de emerxencias de Oleiros. O seu coordinador, Juan Suárez, conta que a nave que ardeu estaba tapiada, e que non sabían que contido tiña. Foi unha vez extinguido o lume cando viron que había material diverso: "electrodomésticos, pezas de vehículos, pneumáticos, un pouco de todo”, di.

A carga de combustible era alta, así que pediron reforzos aos bombeiros de Arteixo e de Betanzos. Malia que o incendio afectaba a unha nave abandonada, sen persoas no interior, había risco de que o lume saltase á nave contigua, que si ten actividade e material almacenado. 

Tres horas e 17.000 litros de auga despois, daban o lume por extinguido. Conseguiron detelo antes de que ardera toda a carga que contiña, pero os danos estruturais son graves. 

"Hai danos estruturais no tellado e no peche da nave", explica Suárez".

A estrutura que suxeita o tellado está danada e hai risco de que colapse. A zona quedou precintada e a electricidade cortada, á espera de que os técnicos municipais determinen se procede dar orde de derrubamento. A Garda Civil investiga as posibles causas do incendio.