Suspenden a folga de autobuses na provincia da Coruña

A folga indefinida do transporte de viaxeiros por estrada na provincia da Coruña  (convocada pola CIG tras o preacordo asinado por UXT e CCOO co patronal, pero que non contou co apoio maioritario dos traballadores) quedou suspendida.

Así o confirmou Ernesto López, representante de CIG Transportes, que explicou que UXT "asinou o preacordo tal como estaba e CCOO estao pensando, nós non", sinalou tras a reunión celebrada este xoves coa patronal e coa mediación do Consello Galego de Relacións Laborais.

Fronte ao manifestado pola central nacionalista, desde UXT precisaron, a través dun comunicado, que non asinaron "ningún acordo". "O que expuxemos é un acordo de eficacia limitada e esta proposta foi trasladada á patronal que, a día de hoxe, non deu resposta".

Xa sobre CCOO, desde a CIG sinalaron que "o pode asinar en calquera momento", argumentaron en relación a un sindicato minoritario no sector, pero cuxa sinatura, xunto á da UXT, implicaría que xa habería un acordo coa patronal.

"Debería haber unha nova reunión, pero non sabemos cando", sentenciou tamén o dirixente sindical tras as asembleas convocadas co persoal para informarlles da situación e decidir sobre a folga indefinida, que se retomou esta semana tras varios aprazamentos e con paros diarios antes.

Mentres, desde UXT, Iván Cancela, representante do sector de Transportes no sindicato, explicou que no seu caso expuxeron á patronal a opción de que aqueles traballadores e traballadoras que así o considerasen asinasen un "convenio de eficacia limitada". "Decidimos ir pola vía de asinar un convenio de eficacia limitada", sinalou sobre a proposta exposta á patronal quen deberá valorar se a acepta.

A esta situación chégase despois dun contexto de unión sindical que nas últimas reunións desembocou nunha división en relación ás posturas mantidas polas centrais sindicais con acusacións á CIG de "desinformación" por parte da patronal e de "actos vandálicos e extorsión" no caso de UXT.

Á súa vez, o sindicato nacionalista, noutro comunicado, cualifica de "traizón" a postura de UXT e de "indefinición" a de CCOO e sostén que o obxectivo é "impoñer un acordo inxusto".