António Costa vota de xeito anticipado e chama os portugueses á participación
O líder dos socialistas votou no Porto
Hoxe votarán anticipadamente máis de 300.000 persoas
Costa fixo un chamamento xeral ás portas do punto de voto nos xardíns do Palacio de Cristal
Portugal escollerá representantes na Asamblea da República o vindeiro domingo 30 de xaneiro pero hoxe as urnas xa estiveron abertas para 300.000 portugueses que solicitaron facelo hoxe anticipadamente. Entre esas persoas, o propio primeiro ministro António Costa.
Á súa saída do punto de votación na cidade do Porto, Costa instou os cidadáns a participaren masivamente nestas eleccións que tiveron que ser adiantadas despois de que o Goberno socialista non sacara adiante os seus orzamentos para 2022.
Nos últimos días o Goberno foi obxectivo de críticas pola decisión de que os cidadáns confinados e positivos en covid–19 poderán achegarse ás urnas canda o resto de cidadáns. Costa dixo hoxe a ese respecto que "están creadas todas as condición para que todos poidan votar con seguridade" e lembrou que os positivos por coronavirus si terán unha franxa para poder exercer o seu dereito: de 18:00 a 19:00 horas.
Os comicios portugueses sofren unha forte abstención historicamente. Nas últimas lexislativas, a participación foi do 54 % e todos os partidos están centrados nesta campaña en espertar o interese e compromiso dos cidadáns lusos para que se acheguen a votar hoxe e o vindeiro domingo 30. Para daquela calcúlase que haberá unhas 400.000 persoas confinadas por contacto ou por estaren infectadas.
