Alivio pola retirada das máscaras entre quen padece cefaleas ou dores de cabeza

A máscara non está considerada un factor determinante para o desenvolvemento das cefaleas, pero logo de dous anos usándoa non hai que desbotar os efectos que puido ter naquelas persoas que padecen dores de cabeza.

"Repercute negativamente neles porque é ter algo que está constantemente premendo a cabeza. Amais tamén afecta á osixenación cerebral. E si que pode repercutir en que esas dores empeoren e o pasen peor", sinala a doutora Beatriz Banga da Clínica Vitalia.

O 19 de abril é o Día Nacional da Cefalea, unha dor de cabeza recorrente que, segundo a OMS, afecta a un 50 % dos adultos e que a raíz da pandemia rexistrou un notable crecemento.

"A máis prevalente é a tensional que é a que ten principalmente orixe ansiosa porque hoxe en día a ansiedade é unha clínica que está moi estendida. É a que se localiza de xeito bilateral.  É unha dor que afecta aos dous lados da cabeza", explica a doutora Banga.

Logo figura a xaqueca, que afecta o 15 % dos doentes e que a OMS sitúa entre as 20 enfermidades que máis incapacitan en todo o mundo.