Alerta en Cangas pola aparición de bolsas de veleno na praia de Rodeira
O Seprona da Garda Civil investiga a orixe do raticida, que tamén atoparon uns mariñeiros nos seus trebellos de pesca
Piden precaución aos donos de mascotas para evitar que poidan inxerir o veleno
Preocupación en Cangas pola aparición de veleno nas praias. A primeira vez, no paseo da praia de Rodeira. É un lugar moi transitado ao que acoden cada día moitos veciños a camiñar e a pasear as súas mascotas. A segunda bolsa atopárona uns mariñeiros nos seus trebellos de pesca. Xa non é a primeira vez que sucede isto en Cangas.
Están a difundir a través das redes sociais as fotografías do veleno. Queren que os propietarios dos cans actúen con rapidez porque as primeiras horas son vitais. Se teñen sospeitas de que puido comer o veleno, deben acudir ao seu veterinario.
É importante amais denunciar, acudir á Policía Local ou á Garda Civil para que poidan dar coa orixe do veleno.
O Seprona da Garda Civil está a investigar a orixe do veleno. Din que é raticida, de uso legal, que se utiliza para matar ratos e que podería aparecer nestes lugares pola mala praxe dun particular sen intención de poñer en risco aos animais que pasean por Cangas.
