Albares sinala de novo a Rusia e ve inaceptable que países europeos "amplifiquen a desinformación"

O ministro de Asuntos Exteriores, José Manuel Albares, insistiu este mércores no papel de redes rusas na xestación da chegada masiva de migrantes a Ceuta e considera "inaceptable" que Gobernos europeos "axudaran a amplificar a desinformación".

Á súa chegada a unha reunión informal de ministros de Exteriores da Unión Europea, Albares sinalou que a UE, neste momento, precisa "unidade e solidariedade" para enfrontarse a tantos desafíos. E recalca que "España espera a mesma solidariedade de todos os seus socios coa fronteira terrestre sur da UE", situada en Ceuta e Melilla.

Un portavoz comunitario remitiuse a un informe elaborado polo Servizo Europeo de Acción Exterior (SEAE), que apunta a que redes rusas "amplificaron" a crise de Ceuta. Segundo o SEAE, identificáronse "intentos por parte de Rusia de sacar partido" á crise migratoria en Ceuta.

"Vimos intentos por parte de Rusia de sacar partido da crise en Internet. Con todo, non dispoñemos de probas concluíntes que suxiran que a crise en si mesma fose provocada pola desinformación de actores estatais estranxeiros", dixo.

O portavoz constata "unha importante actividade de desinformación en redes sociais" sobre o fenómeno da inmigración, que busca "aproveitarse dela, avivar as divisións e aumentar a desinformación".