AGA Ucraína freta dende Pontevedra un novo camión con axuda humanitaria

Cheo ata os topes. Así partiu este mediodía un camión con axuda humanitaria recollida entre os concellos da comarca de Pontevedra. A solidariedade volveu rebordar as previsións da ONG galega AGA Ucraína.

 "Non agardabamos tanta resposta, tanta solidariedade de todas partes", comenta Fátima Ferreira, responsable en Pontevedra de AGA Ucraína

Unha ONG ucraína informábaos do que máis se precisaba.

 "Alimentos non perecedoiros, alimentos precociñados e despois ultimamente tamén comida para animais, porque a situación dos animais alí é dramática, parece que ninguén se acordou deles ata o de agora", apunta Fátima

Habilitaron puntos de recollida, atoparon unha nave onde poder almacenar todo, pero quedaba por solucionar o problema do transporte.

 "Con permiso dos xefes decidimos mandar un camión, o único que me faltaba era que levaba dentro", explica Carme Torres, responsable de RR. HH. de Trans Pereiras

"Aos 15 minutos de estar comentando que non tiñamos camión chamoume Carmen dicíndonos: ?Temos un camión para vós, pero non temos nada para meter dentro', e eu díxenlle: 'Non te preocupes, o que vai dentro xa o temos todo. Foi como un milagre", continúa Fátima Ferreira, responsable en Pontevedra de AGA Ucraína

"Cando Carmen propuxo a idea de mandar un camión a Polonia preguntámoslles aos nosos traballadores, e Daniel, que é o chofer que está aquí, foi o primeiro voluntario que dixo que ía sen problema ningún", fala Damián Pereiras, director de operacións de Trans Pereiras

A Daniel quédanlle por diante case 3.500 quilómetros, se todo vai ben, 5 días de viaxe ata chegar á fronteira onde xa unha organización ucraína se fará cargo de todo o material.