Afectados polos terremotos seguen sen axuda tres días despois
A rexión siria controlada polos rebeldes, a máis abandonada
Continúan atopando superviventes baixo os cascallos
O último balance sitúa xa os mortos por riba dos 15.000 e os feridos preto dos 68.000
Ledicia dos Cascos Brancos sirios tras sacar dous cativos de entre os cascallos. A esta organización de rescatadores voluntarios, cada vida salvada suponlles un esforzo extraordinario.
A esta rexión, controlada polos rebeldes, non chega axuda de Damasco. O primeiro convoi da ONU entrará aínda este xoves desde Turquía.
Tres días despois dos sismos, seguen aparecendo superviventes: este home sacárono na cidade siria de Alepo e esta adolescente, na turca de Hatay. Alí tamén apareceu con vida entre os cascallos un bebé practicamente espido.
Un ancián turco débelles a vida aos bombeiros da Comunidade de Madrid.
"Había unha persoa viva que estaba entre dúas lousas de formigón. Oiámola falar, pero cremos que non a iamos poder sacar. Ao final, despois de 13 horas, sacámolo", conta unha das bombeiras.
Pero centos de desaparecidos seguen sepultados baixo os 6.000 edificios que se derrubaron só en Turquía. Esta muller ten o seu tío atrapado entre os cascallos. Pídelle que fale, para evitar que os equipos de rescate pasen de longo.
O presidente turco visitou unha das zonas afectadas: Recep Tayib Erdogan prometeu que nun ano todo estará reconstruído e que, tras as primeiras dificultades, agora a situación está baixo control.
Non pensa o mesmo esta familia en Gaziantep: que nos manden polo menos unha tenda, di o pai de familia, os nenos teñen fame e están conxelados.
Centos de madrileños achegáronse ata a embaixada de Turquía en España para doar mantas e roupa de abrigo. A Unión Europea convocou para primeiros de marzo unha conferencia de doantes para recadar fondos para os damnificados.
