Adriana Lastra asegura que Cerdán orquestrou unha operación de acoso e derriba contra ela

A exvicesecretaria xeral do PSOE Adriana Lastra asegurou este martes que o exsecretario de Organización dos socialistas Santos Cerdán a enganou e traizoou e orquestrou contra ela unha operación de acoso e derriba que acabou coa súa dimisión.

"A min, Santos Cerdán tamén me enganou e tamén me traizoou. Eu tamén puxera a man no lume por Santos Cerdán, porque o último que podía imaxinar é que estivese involucrado nun caso de corrupción", asegurou a delegada do Goberno en Asturias en declaracións aos xornalistas.

Tras sinalar que foi unha sorpresa ver como se referían a ela naqueles autos que coñecemos da UCO, explicou que sabía da animadversión que Cerdán lle tiña e era coñecedora de todo o que lle fixo durante todo este tempo, sobre todo durante a súa etapa en Madrid, pero non sabía por que.

"Creo que agora xa o sabe toda España. Non era polo que soubese, porque eu evidentemente non sabía nada: era polo que eu puidese chegar a saber", dixo.

Preguntada polos medios sobre que lle fixo o exsecretario de Organización, Lastra asegurou que lle fixo de todo, á vez que explicou que pensaba que o que lle pasaba a Cerdán era unha cuestión de poder, de machismo, de non tolerar que unha muller estivese por encima del.

"Sempre pensei que o que tiña era ese problema", apuntou Lastra tras engadir que foi unha operación de acoso e derriba ata que dimitiu, enferma e embarazada de cinco meses e medio.