Galicia activa o Es-Alert para pedirlles aos veciños das zonas afectadas polo lume que queden na casa

O 112 Galicia informou da activación da ferramenta É-Alert, o sistema que permite enviar alertas instantáneas a todos os teléfonos móbiles nunha área xeográfica específica, debido aos incendios forestais que afectan a varias zonas do sur e sueste da provincia de Ourense.

Nesas mensaxes apúntase que "ante o avance dos lumes, evite calquera desprazamento innecesario e permaneza na súa vivenda".

Tamén se traslada que "se está no exterior e non ten onde confinarse, afástese dos lugares afectados" e solicítase seguir "as indicacións dos servizos de emerxencia" e manterse informado a través de fontes oficiais.
 

🚨 Activado o Es-Alert debido aos incendios forestais que afectan a varias zonas de Ourense.

➡ Ante o avance dos lumes, evite calquera desprazamento innecesario e permaneza na súa vivenda. Se está no exterior e non ten onde confinarse afástese dos lugares afectados. 1/2

— 112 Galicia (@112Galicia) August 15, 2025

A alerta foi recibida, entre outros, por veciños dos concellos de Oímbra, Cualedro, Monterrei, Laza, Verín, Vilardevós, Riós, A Mezquita, A Gudiña. Viana do Bolo, Vilariño de Conso, A Veiga, O Bolo, Manzaneda, Chandrexa de Queixa, Montederramo, Parada de Sil, Castro Caldelas, A Teixeira, San Xoán de Río, Larouco, Petín, A Rúa, Quiroga, Ribas de Sil, Barco de Valdeorras, Vilamarín ou Rubiá. 

O 112 Galicia advertiu, ademais, dun empeoramento das condicións nas próximas horas na comunidade autónoma e pediu extremar as precaucións,  A central de emerxencias de Galicia publicou en X unha mensaxe no que traslada esa indicación dos técnicos.

Desde o 112 faise un chamamento á poboación afectada polos incendios "para que extreme as precaucións e siga as indicacións dos servizos de emerxencias". Suxiren, así, evitar desprazamentos e tamén achegarse ás inmediacións dos lumes.

🚨 Os técnicos alertan dun empeoramento das condicións nas vindeiras horas. Facemos un chamamento á poboación afectada polos incendios para que extremen as precaucións e sigan as indicacións dos servizos de emerxencias, 1/2

— 112 Galicia (@112Galicia) August 15, 2025

Segue activa a situación 2 de emerxencia na provincia de Ourense e o mesmo nivel nos incendios de Toques e Agolada.