O Estado destinará 15 millóns de euros anuais á presenza das linguas cooficiais nas plataformas
Créase un fondo de dobraxe e subtitulación que as plataformas terán que incorporar ao seu catálogo
Garántese un mínimo do 15 % da produción da tv pública estatal en catalán, éuscaro ou galego
O acordo entre o Executivo e ERC para a lei audiovisual axiliza a aprobación dos orzamentos no Senado
O Goberno e ERC pecharon este mércores un pacto que garante o catalán e as demais linguas cooficiais na nova lei audiovisual, o que facilitará a aprobación dos orzamentos xerais do Estado, sinalan fontes da formación republicana.
Segundo aseguran, o acordo "garante o catalán" na lei audiovisual e "facilita a aprobación dos orzamentos para dar impulso ao proceso de negociación".
Segundo especifica ERC nun comunicado, "do acordo despréndese que todas as plataformas que operan no Estado, teñan a sede empresarial no Estado ou non, terán que financiar cada ano producións audiovisuais en catalán". Deste xeito, a nova lei abre a vía ás axudas estatais á produción nas tres linguas cooficiais unha vez que a directiva europea impide aplicar unha cota fixa ás plataformas con sede fóra de España, como Netflix.
O partido catalán tamén detalla que algunhas das medidas acordadas son "que cada ano se destinarán un mínimo de 15 millóns de euros á produción en catalán e no resto de linguas oficiais".
Tamén concreta "a creación dun fondo de dobraxe e subtitulación que as plataformas terán que incorporar nos seus catálogos".
Respecto da televisión pública estatal, "garántese que o mínimo do 15 por cento da produción sexa en catalán, éuscaro ou galego".
O portavoz do PSOE no Congreso dos Deputados, Héctor Gómez, explicou que o fondo para financiar esta produción en linguas cooficiais sairá dos beneficios que obteñan as plataformas.
Goberno e ERC alcanzaran un preacordo de cotas e porcentaxes para as linguas cooficiais na lei audiovisual, pero todo saltou polo aire cando o Executivo admitiu que non podería aplicar eses requisitos a plataformas con sedes no estranxeiro como HBO ou Netflix. Os independentistas ameazaron con poñer en risco a aprobación dos orzamentos xerais e iso abriu un novo proceso negociador.
Tras semanas de reunións discretas entre ERC e o ministro da Presidencia, Félix Bolaños, coa intermediación tamén da vicepresidenta primeira e ministra de Asuntos Económicos, Nadia Calviño, chegouse a este acordo que para ERC dá vía libre á aprobación dos orzamentos xerais do Estado de 2022 no Senado.
