Pol Bueso, fóra de perigo despois do susto que levou en Guijuelo
Estivo tirado no campo vinte minutos agardando por unha ambulancia
O colexiado suspendeu o encontro polo impracticable estado do terreo de xogo
O partido entre o Guijuelo e o Arenteiro tivo que ser suspendido a vinte minutos do final polo lamentable estado do terreo de xogo, enchoupado pola incesante chuvia que caeu na localidade charra.
Foi un partido moi accidentado, porque a segunda parte xa estivera un cuarto de hora parada pola lesión do central do Arenteiro Pol Bueso. Houbo que agardar por unha ambulancia, que tardou en chegar e levou a Bueso a un centro hospitalario en Salamanca.
O xogador quedou en observación e acabou sendo dado de alta. O club comunicou o luns pola mañá que xa estaba na súa casa do Carballiño en perfecto estado.
Era o partido que enfrontaba os dous primeiros da táboa clasificatoria e o resultado foi o de menos (0-0 no minuto 69). O Arenteiro quixo apurar as opcións de xogar cando parase a chuvia pero o Guijuelo negouse. Ao final o colexiado decidiu suspender o encontro co que o equipo galego terá que voltar nunha data que determine a Federación para disputar o que queda de encontro, un prexuizo moi grande para o Arenteiro.
