Acada unha matrícula de honra no bacharelato con 39 anos
Retoumou os estudos para mellorar no laboral e tamén como persoa
Obtivo a segunda mellor nota do instituto, cunha media final de 9,76
"Decides que é máis fácil traballar, porque vou estar a pelexar por uns estudos se agora mesmo non lle vexo unha saída a curto prazo", apunta Alberto Pérez, matrícula de honra no bacharelato con 39 anos.
Esa foi a decisión de Alberto hai máis de 20 anos, cando era un adolescente, pero a vida ensinoulle que foi unha decisión errada.
"Vas vendo que si que necesitabas eses estudos para mellorar, para progresar en calquera posto de traballo".
E decidiu matricularse no bacharelato de adultos. Leva dous anos ás carreiras da fábrica onde traballa de cociñeiro ao instituto, sen tempo para ocuparse da familia a quen agradece todo o seu apoio.
"Se non fose porque eles me permiten desatendelos, literalmente, dedicarme basicamente a traballar e a estudar, non podería facer isto", continúa Alberto.
Pero tamén os profesores foron un grande apoio.
"É unha persoa que nas dificultades medra", opina Josefina Fuentes, mestra de grego no IES 1 de Ribeira.
"A dedicación deles pois a verdade que é marabillosa, o traballo deles non ten prezo", sinala Alberto.
"É un exemplo de que se pode, que se pode ademais cun éxito notable que lle vai abrir moitas posibilidades a nivel laboral e persoais, por suposto", explica Vituca Vidal, mestra de latín no IES 1 de Ribeira.
A ilusión de Alberto sería facer Filoloxía Clásica e non o descarta nun futuro. Polo de agora está centrado nas probas da ABAU e en ir dando pasos certeiros que sirvan de exemplo para o seu fillo, que o vindeiro curso ocupará o seu pupitre no instituto.
