Ábalos admite que permitiu filtrar parte das mensaxes que gardaba e di que son "unha chorrada"

O exministro de Transportes e exsecretario de Organización do PSOE, José Luis Ábalos, recoñeceu que gardaba as mensaxes que cruzou durante anos co presidente do Goberno, Pedro Sánchez, co obxectivo de escribir as súas memorias. Así o explicou este mércores nunha conversa coa cadea La Sexta, onde tamén expresou o seu malestar polas filtracións que o rodean desde que estourou o caso Koldo.

Ábalos sinala que consentiu a publicación das mensaxes de 2023, por consideralas “positivas”, e aclara que entregou unha copia a persoas da súa confianza vinculada coa súa defensa, aínda que non revelou a identidade. En todo caso, precisou que non se trata de Koldo García, o seu exasesor investigado no caso.

Pola contra, negou que fose el o que filtrou as mensaxes correspondentes o ano 2021.

O exministro lamenta sentirse “saturado, doído e incómodo”, e describe a situación como un “pesadelo”. Critica que ninguén do Goberno mostrou empatía con el e afirma ser “o mono de feira, a pelota á que todos lle pegan”. Tamén denuncia que se lle atribuíron falsidades sobre o parador de Teruel, o de Sigüenza ou sobre un catálogo, e asegura que seguen “escarbando” sen ter nada en contra súa.

Insiste en que sempre foi leal a Sánchez, pero que leva 17 meses soportando filtracións e bulos, e afirma que a Policía o vixiaba antes mesmo de que o Congreso aprobara o seu suplicatorio. Asegura que lle dá igual que o acusen de estar detrás das revelacións porque “non filtrou nada”.

Nunha mensaxe publicada na súa conta de X, Ábalos afirmou que simplemente contrastou a información cando o xornal El Mundo lle pediu verificar os chats de 2023, e que non se opuxo á súa publicación porque acreditaban unha relación positiva co presidente. Segundo el, os contidos desmenten que a súa inclusión nas listas do PSOE para as xerais de 2023 tivera como fin aforalo para protexelo, como sostén a oposición, e defenden que foi parte dun “reencontro nunha nova etapa do PSOE”.

Deseo aclarar para evitar especulaciones a raíz de una información sobre la filtración de unos whatsapps correspondientes a una conversación de 2023 con el presidente:

Cuando el medio que los ha publicado me pide contrastar los whatsapps de 2023, no me opongo a su publicación…

— José Luis Ábalos (@abalosmeco) May 14, 2025

En canto aos chats de 2021, Ábalos desvincúlase por completo da súa publicación. Ese ano foi cesado como ministro no verán, aínda que, segundo os propios mensaxes, Sánchez retomou o contacto con el uns meses despois. O exministro critica a hipocrisía dalgúns sectores que, di, “se rían coas filtracións” que afectaban á súa intimidade e agora se escandalizan.

Para Ábalos, o contido dos chats coñecidos non revela nada comprometedor: “Son unha parvada e só demostran a confianza que me tiña o presidente”.