A xustiza arxentina procesa por corrupción ao expresidente Alberto Fernández

A Xustiza arxentina procesou este xoves o expresidente Alberto Fernández (2019-2023) por presuntos actos de corrupción durante a súa xestión de Goberno relativos á contratación de seguros desde o Estado que beneficiarían o marido da súa secretaria privada.

O xuíz Sebastián Casanello axuizou a Fernández baixo o cargo de negociacións incompatibles co exercicio da función pública, que o Código penal de Arxentina castiga con prisión desde un a seis anos e inhabilitación perpetua para exercer cargos públicos. Ademais do exmandatario, foron procesadas outras 33 persoas.

En concreto, o maxistrado precisou na súa sentenza que Héctor Martínez Sosa, intermediario de seguros e esposo de María Cantero, asistente privada do expresidente, foi beneficiado por un decreto publicado en 2021 coa firma de Fernández para que as entidades públicas contratasen os servizos da empresa Nación Seguros.

Ademais, o xuíz Casanello embargou a Fernández por 14.634.220.283 de pesos (11.653.771 dólares) e procesou a Cantero por negociacións incompatibles e incumprimento dos deberes de funcionaria, a Martínez Sosa como partícipe necesario do delito de negociacións incompatibles e ao ex-xefe de Nación Seguros Alberto Pagliano por administración fraudulenta agravada e negociacións incompatibles.

A Fernández imputárao en febreiro de 2024 o fiscal federal Ramiro González por mor dunha denuncia penal da avogada Silvina Martínez, que o acusou dos delitos de violación aos deberes de funcionario público e abuso de autoridade e malversación de fondos públicos.

A denuncia pediu que se investigasen as presuntas irregularidades ao redor do decreto 831, asinado por Fernández en decembro de 2021, polo que ordenou que todos os organismos públicos debían contratar os seguros en Nación Seguros, do estatal Banco Nación, nos que se beneficiaron amigos do exmandatario como intermediarios cobrando millonarias comisións.