A xurista galega Concepción Campos, nova presidenta do Consello da Transparencia
A proposta de Campos foi feita polo Consello de Ministros o 24 de febreiro e aprobada por maioría absoluta pola Comisión de Facenda e Función Pública do Congreso, con votos a favor do PSOE, Sumar, ERC, Bildu, PNV e BNG, a abstención do PP e o voto en contra de Vox
Arquivo Europa Press
A xurista galega Concepción Campos Acuña, ata o de agora presidenta da Asociación de Mulleres no Sector Público, será nomeada este martes no Consello de Ministros presidenta do Consello da Transparencia e o Bo goberno, tras recibir a semana pasada o aval do Congreso dos Deputados.
Campos é doutora en Dereito e codirectora da Cátedra de Bo Goberno Local da Universidade de Vigo. A proposta de Campos foi feita polo Consello de Ministros o 24 de febreiro e aprobada por maioría absoluta pola Comisión de Facenda e Función Pública do Congreso, con votos a favor do PSOE, Sumar, ERC, Bildu, PNV e BNG, a abstención do PP e o voto en contra de Vox. O mandato é por cinco anos, non renovable.
Desde finais de 2020 foi presidente José Luis Rodríguez Álvarez, quen nunha nota de prensa do Consello de Transparencia este martes lembrou entre os seus logros a aprobación dun Estatuto regulador en 2024, que recoñeceu a natureza desta institución como autoridade administrativa independente.
"É unha peza esencial do noso sistema de garantías da transparencia pública no noso Estado democrático", subliñou Rodríguez Álvarez. A pedagoga Carmen Seisdedos foi nomeada presidenta de Mujeres no Sector Público, tras a saída de Campos, informou en X esta asociación. O Consello de Transparencia e Bo goberno foi creado por lei en 2013. Foi presidido por Esther Arizmendi de 2014 a 2017 e por Francisco Javier Amorós de 2017 a 2020.
