A Xunta alega contra a planificación eléctrica do Goberno, que ve discriminatoria, e reclama un 6,7% do investimento

O Consello da Xunta acordou este luns presentar alegacións contra a proposta de Planificación da Rede de Transporte de Enerxía Eléctrica Horizonte 2030, que desde o executivo de Alfonso Rueda cren que "discrimina" a Galicia.

Segundo explicou Rueda, ese planeamento destina menos dun 3 % dos seus investimentos a Galicia.

"Necesitamos infraestruturas modernas axeitadas para as necesidades presentes e futuras", dixo o presidente da Xunta, quen asegurou que nun momento como o actual "de transición verde, con cada vez máis demanda, non é de recibo unha discriminación nas asignacións".

A Xunta reclama para Galicia o 6,7 % do investimento total, de 13.122 millóns de euros, en lugar do 2,8 % previsto.

Na súa comparecencia tras o Consello da Xunta, Alfonso Rueda advertiu que "hai máis dunha ducia de proxectos estratéxicos que non teñen garantida a cobertura das súas necesidades de enerxía" con esta planificación estatal, na que os novos megawatts para Galicia "non chegan a 2.000 fronte aos 8.000" que solicita o Goberno galego.

A conselleira de Economía e Industria, María Jesús Lorenzana, lamentou que esta planificación eléctrica "chega tarde e é lenta", ademais de "insuficiente" para Galicia, polo que considera que se trata dunha "nova discriminación" para a comunidade que pode levar a "condenar" e "facer morrer" proxectos estratéxicos.

Entre as propostas relevantes que a Xunta reitera nas súas alegacións, están a dunha subestación de transporte na zona central e oeste de Lugo -que é fundamental para o proxecto de macrocelulosa de Altri en Palas de Rei- ou unha nova para a zona de Curtis-Teixeiro (A Coruña), onde hai proxectos de hidróxeno verde e centros de datos.

Tamén alega a Xunta que non se atenden as necesidades enerxéticas de proxectos industriais en marcha, xa declarados estratéxicos como os das zonas de Sabón, Ferrol, ou ás zonas de transición xusta.