A Xunta oponse á reforma do regulamento de Costas que o Goberno quere impulsar

A Xunta de Galicia manifestou este luns o seu rexeitamento ao procedemento iniciado polo Goberno central para reformar o regulamento de Costas por mor do expediente de infracción aberto desde a Comisión Europea pola falta de competencia nas concesións do litoral.

En declaracións aos medios previas a un encontro con alcaldes de municipios costeiros galegos e outros axentes do sector mar-industria, a conselleira de Medio Ambiente, Ánxeles Vázquez, expresou que a Administración autonómica non está de "acordo" con como tramitou o Executivo estatal esta cuestión.

Segundo denunciou Vázquez, fíxose pola vía de urxencia, que tan só deixa unha "concisa" marxe de quince días para a consulta pública dun expediente "importante" e que, agregou, consiste aínda nun documento moi xenérico e falto de detalle.

A pesar diso, a conselleira considera que, tras dous "intentos" errados previos, o Goberno tentará de novo reducir os prazos das concesións en espazos do litoral de setenta e cinco a trinta anos e limitar a actividade económica nestas zonas.

"Prohibir para non investir", resumiu Vázquez, que compareceu ante os medios acompañada da conselleira do Mar, Marta Villaverde, quen defendeu a importancia dos sectores radicados nestes lugares para a economía e a sociedade galegas.

A titular de Medio Ambiente xustificou a reunión da tarde deste luns como un intento de dar a coñecer o que está a ocorrer "de primeira man" ás partes involucradas e indicou que a Xunta contestará este documento inicial do Ministerio de Transición Ecolóxica e para o Reto Demográfico

.Así pois, sentenciou que a tramitación se fixo sen "ningún respecto institucional" e sen "transparencia", debido a que considera que non se tivo en conta as comunidades autónomas nin se celebraron as conferencias sectoriais pertinentes.

Hai apenas uns días, o Miteco sacou a consulta pública previa o documento inicial para proceder á modificación do real decreto que rexe o Regulamento Xeral de Costas, polo que a Comisión Europea expedientou a España ao entender que as concesións en áreas de litoral vulneraban a competitividade.

A ollos do organismo comunitario, o Estado non garantiría "un procedemento de selección transparente e imparcial para a adxudicación" destas concesións e, ademais, a posibilidade de prorrogar as existentes por un período de ata setenta e cinco anos sen xustificación é "contraria" ás normas da Unión Europea.