A Xunta esixe ao Concello de Santiago que solucione as verteduras ao Sar
Segundo aseguran desde o consistorio compostelán, os problemas están derivados da posta en servizo da primeira fase da EDAR, e agardan que a situación se normalice nos próximos días
A Xunta, a través de Augas de Galicia, solicitou ao Concello de Santiago que resolva “canto antes os problemas detectados na estación depuradora de augas residuais (EDAR) da Silvouta”, que desde o pasado domingo está a provocar verteduras ao río Sar que afectan os concellos de Ames, Brión e Rois.
Técnicos do Programa de control de verteduras (PCV) de Augas de Galicia desprazáronse de inmediato á zona despois de recibir varios avisos relacionados cunha suposta vertedura ao Sar.
Durante a súa primeira inspección, comprobaron que a orixe do foco estaba na EDAR da Silvouta -infraestrutura municipal- e que desde a semana pasada está en período de posta en marcha, pero sen contar aínda co tratamento necesario para que poida operar con normalidade.
Segundo a Xunta, esta circunstancia sería a razón “pola que o efluente da depuradora mostra un aspecto moi turbio, marrón e con cheiro a augas fecais”, segundo constatou o persoal do PCV.
Despois de recibir un novo aviso onte, luns, e tras comprobar in situ que a situación non cambiara, Augas de Galicia volveu dirixir ao persoal responsable da xestión da EDAR para insistir na importancia de levar a cabo actuacións de mellora no tratamento das augas residuais que recibe.
Así mesmo, o departamento autonómico enviou tamén unha comunicación escrita ao Concello de Santiago para pedirlle que solucione este problema canto antes.
Por parte do Concello compostelán, confirmaron que Acuaes, a sociedade mercantil estatal Augas de las Cuencas de España, informou destes problemas derivados da posta en servizo da primeira fase da EDAR.
Segundo indican fontes do goberno local, a previsión é que esta mesma semana “se normalicen os procesos” que enmarcan na “situación provisional das instalacións”.
