A Xunta eleva a nivel vermello por calor a montaña de Lugo e Valdeorras
Mantense a suspensión da actividade deportiva federada no exterior
O nivel laranxa segue activo en Lugo, Ourense e no interior de Pontevedra
Directo: cámara web da CSAG en Verín.
A Xunta puxo en nivel vermello por calor a montaña de Lugo, que comprende 14 concellos, e a área de Valdeorras, que abarca seis.
Os municipios afectados por este nivel de alerta en Lugo son Baleira, Baralla, Becerreá, Cervantes, Folgoso do Courel, A Fonsagrada, O Incio, Navia de Suarna, Negueira de Muñiz, As Nogais, Pedrafita do Cebreiro, Ribeira de Piquín, Samos e Triacastela.
Por outro lado, os afectados en Valdeorras son O Barco de Valdeorras, Larouco, Petín, A Rúa, Rubiá e Vilamartín de Valdeorras.
Segundo o Goberno galego, continúan en nivel laranxa o sur de Lugo, o Miño, noroeste, montaña e sur de Ourense e interior de Pontevedra. Así, o centro de Lugo está en nivel amarelo.
Neste contexto, o Executivo autonómico ampliou a suspensión da actividade deportiva federada en toda a provincia de Ourense, sur de Lugo e no interior de Pontevedra ata as 21:00 horas deste martes.
Así, algúns concellos afectados en Lugo son A Pobra do Brollón, Chantada, Monforte de Lemos, A Fonsagrada, Pedrafita do Cebreiro e Ribeira de Piquín, entre outros.
No interior de Pontevedra afecta a Agolada, A Estrada, Forcarei, Lalín, A Lama, Moraña, Rodeiro, Silleda e Vila de Cruces, entre outros, mentres que en Ourense afecta a tódolos concellos.
Quedan permitidas as actividades acuáticas, coa recomendación de que non se realicen nas horas centrais do día, é dicir, de 12:00 a 17:00 horas.
