A Xunta e as universidades amplían as validacións para alumnos de FP

Os estudantes que superasen ciclos superiores e decidan continuar a súa formación na universidade poderán solicitar o recoñecemento de determinadas materias. Será posible tras a sinatura dun convencio entre a Xunta coas tres universidades galegas para a convalidación de estudos.

O conselleiro de Cultura, Educación e Universidade, Román Rodríguez, e o reitor da Universidade de Santiago, Antonio López; o da Universidade de Vigo, Manuel Reigosa; e o da Universidade da Coruña, Julio Abalde, asinaron estes martes este acordo, que terá unha vixencia de catro anos (ata o curso 2024-25) e que dá continuidade ao convenio formalizado en 2017, vixente ata o de agora.

"Galicia volve estar por diante a nivel estatal”, declarou o conselleiro de Educación, en referencia a unha recente proposta do Ministerio para empezar a traballar na convalidación de estudos entre FP e as universidades.

Mediante o convenio, os estudantes que superasen ciclos superiores de grao e decidan continuar os seus estudos nalgunha das tres universidades galegas poderán solicitar que se lle recoñezan certos créditos de determinadas materias nun total de 188 graos e catro dobres graos, o que supón un un incremento de case un 22 % con respecto ás 151 titulacións e dúas dobres titulacións incluídas no convenio anterior.

Para facer efectivo o recoñecemento, os interesados deberán tramitar a correspondente solicitude de acordo co procedemento establecido en cada universidade.

No caso de títulos oficiais que non figuren nos anexos de recoñecemento directo, os interesados poderán solicitar a cada universidade o recoñecemento de créditos nos títulos universitarios oficiais, que serán obxecto de análise individual e non de recoñecemento directo.

O titular de Educación sinalou que a Xunta de Galicia leva "anos traballando para conseguir unha maior interrelación entre os graos formativos e os graos universitarios, estreitando lazos de colaboración a todos os niveis".

Para Rodríguez, o éxito educativo de Galicia maniféstase en índices como a caída histórica do abandono escolar ata o 8 % e taxas de empregabilidade en formación profesional que alcanzan o 85 % en xeral e chegan case ao 97 % no caso de FP dual.

"O obxectivo é mellorar as oportunidades das persoas que están en proceso de formación" e "construír unha pasarela ou ponte de comunicación entre os diferentes niveis educativos", declarou o conselleiro.

Pola súa banda, o reitor da universidade de Santiago, Antonio López, que falou en nome das tres universidades, asegurou que o convenio pretende "favorecer esa conexión entre os niveis superiores de ensino tanto de FP como universitario, favorecendo a continuidade".

"Quédanos outro paso por dar, que sería para os estudantes universitarios que deciden despois cursar estudos de FP", engadiu o reitor, que asegura que é necesario buscar "unha fórmula similar de recoñecemento parcial" para poder validar os estudos neste sentido.

Con todo, López asegurou que esta fórmula "ten outras complicacións adicionais", xa que a normativa que regula as titulacións de FP é de ámbito estatal, polo que "non é tan fácil de liquidar".

Neste curso escolar, preto de 1.500 alumnos que accederon ás universidades galegas fixérono obtendo o título en Formación Profesional.

Ademais, segundo o estudo de empregabilidade de FP presentado onte, aproximadamente a metade de todos os titulados en ciclos formativos o ano pasado optan por continuar os seus estudos e desa metade, preto do 25 % optan por estudos universitarios, principalmente nas ramas de Ciencias Sociais e Xurídicas e Ciencias da Saúde.

Os reitores aseguraron que existen "notables diferenzas" entre a empregabilidade xerada en FP e na universidade, xa que a maioría dos estudantes que realizan estudos universitarios continúan formándose a través de "mestrados e doutoramentos", de maneira que a inserción laboral non é tan inmediata.