A Xunta activa un programa para acelerar a integración laboral de migrantes acollidos á regularización

 O presidente da Xunta, Alfonso Rueda, anunciou este luns a posta en marcha de "un programa específico" dotado de 2,6 millóns para facilitar e acelerar a integración laboral das persoas acollidas na comunidade ao proceso de regularización extraordinario promovido polo Goberno central.

En concreto, esta iniciativa busca atallar unha das "numerosas carencias" denunciadas prol a Administración autonómica sobre o proceso posto en marcha polo Executivo central, como a ausencia de medidas de acompañamento efectivas que se traduzan en oportunidades reais de emprego para conseguir unha integración plena, e favorecer que o cambio na situación administrativa destas persoas beneficie tanto ás empresas con dificultades para cubrir vacantes como ao conxunto da comunidade.

"O obxectivo é promover unha migración ordenada, segura e eficaz e que, ademais, estea conectada coas necesidades do tecido produtivo e a urxencia de cubrir postos vacantes", explicou o máximo mandatario autonómico. 

Rueda lembrou que a Xunta "non está de acordo coa forma na que o Goberno central realizou esta regularización, "xa que non se consultou ás comunidades, nin se avaliou o seu impacto sobre os servizos públicos do Estado do Benestar e tampouco se garantiron os fondos para unha correcta integración".

De feito, indicou que o Goberno galego considera vital avanzar neste ámbito tendo en conta que o resultado deste proceso extraordinario de regularización xa está a ter impacto nas cifras do paro rexistrado en Galicia.

Tal e como indicou Alfonso Rueda, na actualidade hai "máis de 2.100 persoas rexistradas nas oficinas de emprego da comunidade como consecuencia deste proceso" e o feito de contar con traballo "é básico para alcanzar unha integración plena no territorio".

"Galicia está a facer o necesario para que estas persoas traballen e sumen e póidanse integrar para que esta terra prospere", asegurou.

O programa arrinca cun orzamento inicial de máis de 2,6 millóns e inclúe a firma de convenios de colaboración con "nove entidades sen ánimo de lucro -Cáritas Federadas en Galicia, Cáritas Diocesana de Lugo, Federación de Escolas Familiares Agrarias de Galicia, ONG Rescate Internacional, Unións Agrarias-UPA, Fundación Juan Soñador, Asociación Ecos do Sur, ONG Mestura e Cruz Vermella Española en Galicia- que, tal e como indicou o presidente, "contan cunha ampla experiencia na inserción laboral e social das persoas migrantes".