A Xunta activa a alerta laranxa por temporal costeiro no oeste da Coruña
Suspéndese a actividade deportiva do programa Xogade e a federada no mar nos concellos afectados
Imaxes de Fisterra da cámara web da TVG
A Xunta activou para este sábado a alerta laranxa por temporal costeiro no oeste da Coruña.
Segundo a Axencia Estatal de Meteoroloxía (Aemet), o fenómeno meteorolóxico adverso estará activo desde primeira hora desta tarde. Agárdase vento do nordeste de ata forza 8 entre Fisterra e as Sisargas.
A Secretaría Xeral para o Deporte da Consellería de Presidencia, Xustiza e Deportes anunciou a suspensión da actividade deportiva Xogade e da federada no mar nos concellos da costa oeste da Coruña -Camariñas, Carnota, Cee, Corcubión, Fisterra e Muxía- desde primeira hora desta tarde ata o amencer do domingo.
A Xunta lembra a importancia de manterse afastado da liña de costa, isto é, diques, rompentes e paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e os amarres das embarcacións.
.jpg)
