A xuíza do Alvia amósase a favor de indultar o maquinista por razóns de xustiza e equidade

A xuíza do accidente ferroviario do Alvia ocorrido en xullo de 2013 no barrio santiagués de Angrois, no que faleceron 80 persoas, informou favorablemente da petición de indulto formulada polo maquinista Francisco Garzón Amo, condenado a dous anos e medio de prisión polo descarrilamento do tren.

A maxistrada María Elena Fernández subliña que o maquinista carece de antecedentes penais e que a responsabilidade civil obxecto da condena foi aboada. Lembra ademais que Francisco Garzón está actualmente xubilado, polo que a posibilidade de que volva delinquir no futuro é practicamente nula.

A xuíza entende que concorren razóns de xustiza e de equidade para concederlle a graza solicitada, dado que a conduta delituosa se cometeu por unha imprudencia profesional, grave pero concentrada nun breve espazo de tempo no que perdeu a atención durante unha conversa telefónica co interventor.

Lembra tamén a deficiencia da sinalización do tramo no que se produciu o accidente e de medidas de seguridade que diminuísen o risco dun exceso de velocidade de tal calibre.

E subliña o profundo pesar do penado pola dor xerada ás vítimas e ás súas familias, patente desde o primeiro momento tras o accidente e durante a tramitación do procedemento e a celebración do xuízo.

A xuíza asina este auto unha semana despois de que o fiscal xefe da área de Santiago Antonio Roma se mostrase a favor do indulto parcial do maquinista do Alvia por relevantes razóns de xustiza e equidade. O sindicato de maquinistas (SEMAF) promoveu a solicitude deste indulto ante o Ministerio de Presidencia, que neste momento está en tramitación.