A USC, entre as 600 mellores universidades do mundo segundo o ránking de Xangai
A Universidade de Santiago é a mellor das galegas, ao manterse a metade da táboa
A Universidade de Vigo, entre as 1.000 mellores, sitúase no derradeiro rango, mentres a da Coruña non aparece no ránking
A mellor universidade española é a de Barcelona e a de Harvard repite como a primeira do mundo
A entidade que publica o Ránking de Xangai, a clasificación internacional de universidades máis recoñecida, vén de publicar a edición deste ano. A Universidade de Santiago mantense entre as 500 e as 600 mellores do mundo, ás portas do top 10 español. A Universidade de Vigo sitúase por debaixo das principais 900 a nivel global e entre a 25 e a 30 a nivel estatal.
En total, ARWU clasifica anualmente máis de 2.500 universidades e publica a listaxe coas 1.000 mellores, entre as que non figura a Universidade da Coruña. A mellor universidade española é a de Barcelona, mentres a de Harvard repite como a mellor do mundo.
Xangai utiliza seis indicadores obxectivos para clasificar as universidades mundiais, incluíndo o número de persoal investigador altamente citado, o número de artigos publicados en revistas de Nature e Science, o número de artigos indexados no Science Citation Index - Expanded e no Social Sciences Citation Index, o rendemento per cápita de cada universidade e o número de ex estudantado e persoal galardoado con Premios Nobel e Medallas Fields.
