A socialista Elena Espinosa renunciará á súa acta de deputada no Parlamento

Elena Espinosa, viceportavoz do PSdeG na Cámara galega, presentará este mércores a súa renuncia como deputada autonómica. A que foi ministra de Agricultura e actualmente é terceira tenenta de Alcaldía en Vigo, encabezou nas pasadas eleccións autonómicas de 2024 a candidatura do PSdeG pola provincia de Pontevedra. 

Presenta a súa renuncia nun contexto en que se aveciñan eleccións municipais, co obxectivo de centrarse no seu labor na Cidade Olívica. Fontes socialistas trasladaron que, coa súa marcha como parlamentaria autonómica, Espinosa pecha un ciclo político que iniciou hai algo máis de dous anos.

Unha etapa na Cámara galega onde, segundo apuntan estas fontes, "destacou por liderar a fiscalización da xestión do Sergas nunha das etapas máis críticas da sanidade pública galega coa deterioración da Atención Primaria".

Coa renuncia de Espinosa, prevese que regrese ao Hórreo o que xa fora deputado Julio Torrado, quen ocupou o número catro pola lista de Pontevedra e quedou ás portas de conseguir acta nas pasadas autonómicas, nas que o PSdeG baixou de 14 a 9 a súa representación na Cámara galega.

Torrado, portavoz da Executiva do PSdeG e secretario xeral do PSOE de Vilagarcía de Arousa e actual asesor do Grupo Parlamentario, ostentou a portavocía de sanidade do PSdeG na pasada lexislatura.

O cambio na bancada socialista prodúcese a unha semana de que a Cámara galega acolla o Debate do Estado da Autonomía, no que é habitual que os viceportavoces parlamentarios sexan os encargados de defender as propostas de resolución de cada formación.

Coa incorporación de Torrado, que podería tomar xa posesión da súa acta no propio debate de política xeral, o PSdeG afrontará no Pazo do Hórreo o seu segundo cambio no que vai de lexislatura. O primeiro produciuse coa saída do exdeputado Julio Abalde, quen deixou as súas responsabilidades no Lexislativo para facerse cargo da Subdelegación do Goberno na Coruña.