A sexta onda desescala cara a unha atención centrada nos vulnerables
A mellora na situación epidemiolóxica permite xa destensionar as restricións e a realización de probas diagnósticas
O sistema de saúde traballa xa nunha desescalada de todas as actividades establecidas para o control da pandemia. Nos hospitais, por exemplo, trabállase xa para normalizar a atención dos pacientes covid positivos sen síntomas e que ingresan por outras patoloxías. A idea é centrar o esforzo covid na atención dos inmunodeprimidos e na vixilancia extrema dos non vacinados.
"O sistema non pode seguir aguantando esta presión de ir á análise individualizada de cada caso positivo ou de contactos estreitos".
Por iso e porque a onda remite, desaparecen as ringleiras que viamos hai semanas nos centros de cribado, que quedan agora reducidos a un servizo de diganóstico, pero con moito menos movemento.
O esforzo de detección está agora na vixilancia global. E deséñase nun sistema sentinela, aleatorio, como o da gripe, combinado con outros sistemas ensaiados durante a pandemia e que se amosaron eficaces como a análise de augas residuais, que permite adiantar as tendencias entre sete e dez días. E tamén a detección de variantes.
"Pero non debemos entrar en pánico cada vez que a ciencia comunica que aparece unha nova variante", advirte o microbiólogo da USC Jesús López Romalde.
As variantes hai que vixialas, e se ningunha máis virulenta lle dá unha volta á situación, as perspectivas son boas.
"De que imos realmente cara á fin da pandemia como tal, e á incorporación do SARS-CoV-2 coma un virus dos que habitualmente traballamos; cos esforzos postos atopar estratexias de protección dos vulnerables", explica a xefa de Preventiva da área de Santiago, Cristina Fermández.
