A Semana Santa recupera os niveis de ocupación hostaleira da prepandemia
As reservas en Sanxenxo superan o 70 % e en Santiago, o 90%
A última semana é clave para disparar as reservas se o tempo acompaña
"A ocupación en toda Galicia vai ser extraordinaria, con toda a prudencia do momento, tanto nas catro provincias, no que é a zona urbana como na zona costeira, como o que é o interior de Galicia", fala Dulcinea Aguín, presidenta da Asociación de Vivendas Turísticas de Galicia.
Con esa contundencia fala a presidenta de Aviturga. Porque os datos invitan ao optimismo. Só en Sanxenxo hai xa reservado o 78 % das vivendas que teñen para uso turístico. Tamén os hostaleiros están satisfeitos cos niveis de ocupación.
"A verdade é que nos enfrontamos con moito optimismo e, sobre todo, cun ritmo bastante bo de reservas, podemos estar agora mesmo sobre o 70 % de reservas", apunta Alfonso Martínez, presidente do Consorcio de Empresarios Turísticos de Sanxenxo.
En Santiago empeza a notarse o tirón dos peregrinos neste segundo ano santo.
"As esperanzas e as perspectivas son moi boas. Estamos xa estes días superando practicamente a diario xa os trescentos peregrinos", explica Alfonso Rueda, vicepresidente primeiro da Xunta de Galicia
"E o que nos estamos atopando é cunha ocupación bastante alta, incluso pode chegar ao noventa por cento na zona vella", comenta Thor Rodriguez, presidente da Asociación Hostalería Compostela
"De xoves a domingo estamos ao cen por cento", di Sara Santos, hostaleira.
Con todo, queren falar de prudencia, porque a Semana Santa sempre se decide á última hora, máis este ano polas consecuencias da guerra.
"É todo como máis de última hora, de feito o cliente internacional aínda non hai unha recuperación, iso significa un 10 % menos que no ano 2019", indica Esteban Iglesias, presidente da Unión Hoteleira Compostela.
