Malestar no PSOE tras as palabras de Lambán sobre o presidente do Goberno

A dirección do PSOE dá por boas as explicacións e acepta a rectificación que o presidente de Aragón, Javier Lambán, fixo ao seu comentario de que a España lle iría mellor se accedese ao liderado do partido o expresidente asturiano Javier Fernández no canto de Pedro Sánchez.

Lambán, segundo fontes de Ferraz, deu explicacións suficientes nun chío sobre o que quixo dicir a véspera nun coloquio público en Zaragoza. Nel sinalou que a súa "afinidade e coincidencia con Javier Fernández" non debe de ser entendida "como unha deslealdade a Sánchez", con quen discrepa nalgunhas cousas, pero conta coa súa lealdade e apoio.

Ademais, este xoves amplioulles aos xornalistas nos corredores das Cortes de Aragón que as súas palabras foron "manifestamente inoportunas e desafortunadas", pois "daban lugar a interpretacións que de ningún xeito tiñan que ver co que quería dicir".

As fontes socialistas recoñeceron que o comentario de Lambán puidera non sentar ben a algúns compañeiros de partido.

A ministra portavoz do Goberno, Isabel Rodríguez, tamén vocal da executiva socialista, limitouse a contestar "que se explique el" ao acudir á conferencia anual da Asociación de Medios de Información (AMI).

Outros dirixentes tamén se afastaron do comentario de Lambán contra Sánchez, como a portavoz socialista no Senado, Eva Granados, quen resolveu: "Non comparto en absoluto as declaracións que fixo o presidente de Aragón".

Para o Partido Popular, as declaracións de Lambán recollen o sentir de moitos militantes socialistas. Pero lamentan que non se traduza nas votacións parlamentarias. E piden recuperar o pacto constitucional.