A rebaixa do IVE para a luz e o gas desactivarase o 1 de xuño e volverá ao 21 %

O IVE da electricidade e o do gas natural, briquetas, pellets e leña pasará o 1 de xuño do tipo rebaixado do 10% ao tipo xeral do 21%, tras a contención dos prezos de consumo destas subministracións no mes de abril, informou este xoves o Ministerio de Economía.

"A caída nos prezos da electricidade e do gas natural permiten iniciar a desactivación das medidas sobre o imposto especial sobre a electricidade e o IVE", di o comunicado de Economía, que fai referencia tamén á reversión da rebaixa do imposto sobre a electricidade, que pasará o 1 de xuño do 0,5 ao 5% habitual.

No entanto, a suspensión do imposto sobre o valor da produción da enerxía eléctrica continuará ata o 30 de xuño, así como o resto de medidas sectoriais, como as axudas a agricultores e transportistas, e os descontos reforzados do bono social eléctrico, do 42,5% para consumidores vulnerables e do 57,5% para vulnerables severos."O efecto das medidas do plan de resposta na inflación xeral é dunha moderación próxima a un punto porcentual", sinala Economía, á vez que fai fincapé en que o Goberno seguirá monitorizando a evolución dos prezos nun contexto de elevada incerteza.

O decreto lei co plan de resposta á guerra contra Irán, que se aprobou o 20 de marzo nunha reunión extraordinaria do Consello de Ministros, aseguraba as rebaixas fiscais para abril e maio, pero prevía a súa desactivación a partir de xuño en función da evolución dos prezos.

O IVE dos carburantes seguirá rebaixado ata o 30 de xuño

A rebaixa ao 10% do IVE dos carburantes (gasolinas, gasóleos e biocarburantes e devolución parcial do gasóleo profesional), así como os tipos reducidos do imposto sobre hidrocarburos, permanecerá vixente ata o 30 de xuño, posto que a inflación en abril para estes produtos mantense por encima do limiar do 15% fixado polo Executivo.

O Ministerio de Economía sinala que os carburantes seguen presionados á alza pola guerra en Irán, pero insiste en que o plan de resposta está a cumprir o seu obxectivo de amortecer o impacto, xa que moderou a inflación deste produto en máis de 16 puntos porcentuais.