A quinta derrota seguida volve deixar o Cangas ao bordo do precipicio

Quinta derrota consecutiva dun Cangas Frigoríficos do Morrazo que complica a súa situación na Asobal. O equipo galego é o que acumula unha peor serie de resultados agora mesmo na competición e pasou de ter unha boa marxe co posto de play out a quedar só dous puntos por riba do perigo. 

Comezou ben o partido en León (5-8) pero tres exclusións consecutivas mediado o primeiro tempo déronlle a posibilidade ao Ademar de igualar o partido (10-10) e de ir ao descanso cunha vantaxe de catro goles (21-17). A diferenza mantívose arredor deses catro tantos durante todo o segundo tempo malia os intentos do equipo do Morrazo por remontar. Só no treito final reduciron a diferenza dun partido que acabou cun 38-36. 

Carlos Álvarez, xogador pontevedrés do Ademar, foi o máximo goleador do partido con sete tantos. A vindeira xornada xogan contra o Torrelavega, gran sorpresa do campionato, antes de encadear tres partidos que pasan a ser decisivos (Cuenca, Nava e Guadalaxara).