A presión na UCI do hospital Montecelo obriga a suspender operacións en dous quirófanos

Con 2.575 casos activos, 60 máis ca onte, a área sanitaria Pontevedra-O Salnés é unha das que presenta peor evolución.

Preocupa a presión hospitalaria con 40 ingresados en planta, pero sobre todo pola ocupación da UCI, onde os pacientes covid,  nove a día de hoxe, xa ocupan a metade dos recursos.

Esta situación obrigou a reducir o número de intervencións cirúrxicas que poden necesitar deste área. En concreto deixase de operar  na quenda de mañá en 2 dos 15 quirófanos cos que contan no hospital Montecelo. 

Preocupa tamén a afectación doutras áreas como Atención Primaria e urxencias, as primeiras en atender os enfermos.

Con 173 positivos rexistrados nas últimas 24 horas, hoxe centos de persoas facían ringleira ás portas do hospital provincial para realizar unha proba PCR.