A presenza de gas pementa obriga a desaloxar os veciños dun edificio de Oleiros
Unha desavinza entre veciños está detrás deste acto vandálico polo que o responsable se enfronta a unha sanción administrativa
Caía xa a noitiña e a maior parte dos veciños do número 17 da rúa Areal de Perillo estaban xa nos seus domicilios. Unha estraña sensación nas vías respiratorias alertounos da posibilidade dunha fuga de gas.
Foi un dos veciños o que deu a voz de alarma á policía local. De inmediato acudiron os axentes locais e a Garda Civil, ademais de bombeiros, Protección civil e urxencias médicas. Ordenaron desaloxar os trinta veciños do inmoble e confinaron nos seus pisos a dúas persoas con mobilidade reducida.
Tras das análises realizadas conseguiron identificar o gas pementa como o causante da intoxicación. As desavinzas entre dous veciños do mesmo andar están detrás deste acto vandálico tal e como o cualifican as forzas de seguridade.
A Televisión de Galicia puido falar co responsable deste suceso. Prefire manter o anonimato, pero está arrepentido da súa acción. Segundo lles relatou aos axentes, as desavinzas veñen pola tenza de dous cans. Asegura que tivo un mal momento e pide desculpas a toda a veciñanza. Agora enfróntase a unha sanción administrativa.
