A ministra de Facenda rexeita a proposta de Díaz e Belarra de conxelar as hipotecas

Se onte o BBVA anunciaba os maiores beneficios da súa historia, hoxe era o Santander o que batía o seu propio récord ao gañar 9.600 millóns en 2022, un 18 por cento máis. A presentación de resultados dos grandes bancos españois, unida ao encarecemento das hipotecas polo Euríbor, leva a Podemos a insistir na súa conxelación.

Ione Belarra urxe a intervir ante estes beneficios. "Como imaxino que non se pode dicir que eses beneficios milmillonarios son capitalismo desapiadado, vou dicir que son absolutamente impúdicos. Que o Goberno actúe o antes posible con ese tope ás hipotecas é unha urxencia".

Na mesma liña, Yolanda Díaz aseguraba que a crise non pode "ser escusa para que os bancos gañen máis". "Levo pedindo hai moitos meses xa a conxelación das cotas hipotecarias", lembrou a vicepresidenta segunda.

A ministra de Industria aseguraba que o Goberno ía estudar esta proposta. Dicía Maroto que "hai necesidade de concienciar estas empresas, sobre todo ás que teñen beneficios extraordinarios".

Pero nin a vicepresidenta económica nin a ministra de Facenda comparten esa solución. Calviño cre que afectaría á estabilidade financeira, e Montero lembra o plan de rescate a hipotecados que entrou en vigor en decembro. "De forma voluntaria moitas entidades presentaron a súa adhesión a este plan, que espero que cando teñamos os datos poñan de manifesto que foi unha axuda eficaz. Hoxe por hoxe esas son as medidas que o goberno ten enriba da mesa e as que imos aplicar".

A patronal bancaria apela a este acordo co Executivo como exemplo do seu apoio aos clientes vulnerables.