A mina de wolframio de Valborraz, un vestixio nazi que loita pola súa supervivencia
Foi a única mina xestionada directamente pola Alemaña nazi, cando o wolframio era estratéxico para a fabricación de material bélico
Esta fin de semana comezaron os traballos de recuperación deste enclave, obxecto dun dos escenarios da Segunda Guerra Mundial
Mina de Valborraz, en Carballeda de Valdeorras, un dos escenarios da Segunda Guerra Mundial EFE/Brais Lorenzo
A antiga mina de wolframio de Valborraz, situada na parroquia de Casaio, no municipio ourensán de Carballeda de Valdeorras, busca a supervivencia deste singular enclave que data da Segunda Guerra Mundial e cuxa importancia radica na extracción deste mineral estratéxico.
A asociación científica Sputnik Labrego en colaboración co Albergue Eco dos Teixos e a Comunidade de montes de Casaio e Lardeira iniciou este sábado co apoio dun grupo de vinte voluntarios os traballos de retirada de entullos das estruturas da mina para recuperar este importante enclave.
A importancia desta mina radica en que foi un lugar estratéxico na extracción de wolframio que floreceu en Galicia durante as décadas de 1940 e 1950, cando este mineral era estratéxico para a fabricación de material bélico.
Un grupo de veinte personas achegáronse ata os Montes de Trevinca para retirar de entullos as estructuras da mina de Valborraz. EFE/Brais Lorenzo
Foi a única mina xestionada directamente pola Alemaña nazi, o que a converte nun testemuño excepcional da presenza alemá na España da posguerra.
De feito, o equipo de Sputnik Labrego, onda diferentes historiadores, documentou nos últimos anos testemuños relacionados coa historia da mina, que destaca tanto polo seu valor histórico como polo seu potencial educativo e turístico.
“O que queremos é retirar os entullos destas estancias e facer unha primeira valoración dos problemas estruturais para poder recuperalos no futuro”, explicou o presidente da asociación, Carlos Tejerizo.
EFE/Brais Lorenzo
Os traballos de limpeza, que se prolongarán durante toda a fin de semana, centraranse na parte inicial da mina e nos barracóns dos traballadores dos anos cincuenta e sesenta, ao tratarse de "edificios que foron moi afectados polos incendios e centrais para a comprensión do sitio, xa que son os primeiros que se ven nada máis chegar á mina”, abundou Tejerizo, quen avoga pola importancia de preservar este tipo de espazos, como parte importante do patrimonio.
“Tan importante como a limpeza e recuperación dos espazos é facer partícipe á cidadanía na recuperación dun patrimonio que é de todo o mundo. Ademais, esperamos que a administración tomen nota para actuar antes de perder para sempre este espazo”, concluíu Tejerizo.
EFE/Brais Lorenzo
