A maquinaria do Congreso actívase coa constitución hoxe dos grupos parlamentarios
Na reunión de hoxe toca dar o visto e prace aos grupos do PSOE, Sumar e Mixto, en que estarían o BNG, CC e UPN
Xunto a eles sobre a mesa está tamén a petición de JxCAT para formar grupo propio grazas aos catro deputados que lle cede o PSOE, e de ERC, grazas aos dous de Sumar
A maquinaria do Congreso dos Deputados ponse en marcha este luns coa constitución dos grupos parlamentarios, paso previo a outros moitos trámites, desde a adxudicación de escanos ou despachos ata a determinación das comisións ou dos membros da Deputación Permanente.
Nesta XV lexislatura recentemente inaugurada, a engrenaxe que move a actividade parlamentaria vaise aos poucos activando para que, entre outras cousas, para que se poidan celebrar sesións como o debate de investidura, previsto para os días 26 e 27 de agosto.
Para iso, a Mesa do Congreso, o seu órgano de goberno, celebrará esta tarde a súa segunda reunión tras a mantida o pasado 18 de agosto, onde xa se aprobou a constitución dos grupos parlamentarios do PP, Vox, EH Bildu e PNV.
Na reunión de hoxe toca dar o visto e prace aos grupos do PSOE, Sumar e Mixto, no que estarían o BNG, CC e UPN, previsiblemente.
Xunto a eles sobre a mesa está tamén a petición de JxCAT para formar grupo propio grazas aos catro deputados que lle cede o PSOE; e de ERC, grazas aos dous de Sumar.
A pesar de que os dous partidos independentistas cataláns non cumpren todos os requisitos que marca o regulamento, a proposta seguramente sairá adiante, xa que é a Mesa do Congreso, onde a esquerda ten maioría e que é soberana para interpretar o Regulamento, a que dá a súa conformidade á saída ofrecida por Sumar e PSOE a ERC e Junts.
Lograr grupo é importante porque permite, por exemplo, o acceso a subvencións que dá o Congreso e o Senado e que son menores se os deputados ou senadores non están adscritos a un grupo e teñen que permanecer no grupo parlamentario Mixto.
E no Senado
Na Cámara Alta, a primeira reunión da Mesa tras a constitución das Cortes celebrarase mañá martes, presidida polo senador Pedro Rollán, do PP, formación que conta con maioría absoluta no hemiciclo e no seu órgano de goberno.
Tamén aquí a Mesa deberá autorizar os grupos que solicitaron a súa constitución, que son seis: PP, PSOE, ERC e EH-Bildu conxuntamente, PNV, Junts e nacionalistas e as minorías de esquerda, aos que se engadirá o grupo Mixto para quen non teñan acomodo ou non cumpran os requisitos.
Nesta cámara, o PSOE cedeu senadores ao PNV, a Junts e ás minorías de esquerda para que poidan ter grupos propios; pero o PP pediu un informe aos servizos xurídicos do Senado para avaliar a viabilidade dos préstamos, unha práctica que xa se repetiu en lexislaturas anteriores.
Os socialistas achegan os escanos necesarios para chegar ao mínimo de dez senadores esixido polo Regulamento para constituír grupo propio, pero esa mesma norma tamén establece que unha vez constituído o grupo, os seus membros nunca poden baixar de seis.
Como o PNV só ten cinco escanos no Senado, o PSOE debería ceder un permanentemente aos nacionalistas vascos.
Algo parecido ocorre cos partidos de esquerda, pero con JxCAT non sucede porque aos seus tres senadores suma un de Coalición Canaria, outro do BNG e un máis da Agrupación Herreña Independente (AHI) de modo que poden contar con seis tras o préstamo inicial de catro socialistas para formalizar o seu grupo parlamentario.
