A inflación repunta ao 3,5 % e os alimentos mantéñense no 10,5 %

A inflación interanual situouse no 3,5 % en setembro, nove décimas máis ca en agosto, impulsada pola enerxía, e os alimentos mantivéronse no 10,5 %, segundo publica este venres o Instituto Nacional de Estatística (INE).

A inflación xeral acumulou así tres meses consecutivos á alza, mentres que a subxacente, aquela que elimina os efectos da enerxía e os alimentos frescos, moderou tres décimas respecto a agosto, ata o 5,8 %.

Estes datos, que confirman os adiantados polo INE a finais de setembro, destacan o encarecemento da electricidade e mais dos carburantes e lubricantes respecto aos abaratamentos que experimentaron hai un ano. 

En Galicia, a inflación interanual situouse no 3,7 % en setembro, un punto máis que en agosto comparada co mesmo mes do ano anterior, impulsada pola enerxía, e os alimentos caeron unha décima, ata o 10,6 %.

Desde o Ministerio de Asuntos Económicos destacaron que "España leva máis dun ano entre os países con menos inflación e maior crecemento económico da zona euro", e que a subxacente marcou en setembro "a menor taxa no último ano".

De volta aos datos, a repunta da inflación debeuse á moderación en cinco puntos da caída dos prezos da vivenda, ata o -13,1 %, polo encarecemento da electricidade respecto ao mes pasado que fai que se free a caída acumulada.

Así mesmo, os prezos do transporte aceleraron a súa suba máis de dous puntos e medio, ata o 3,8 %, polo encarecemento dos carburantes e lubricantes e a estabilidade do transporte de pasaxeiros.

A repunta da inflación produciuse a pesar da moderación dos prezos do lecer e a cultura, polo maior abaratamento dos paquetes turísticos, e do vestido e o calzado, polo menor encarecemento dos artigos de nova tempada.

Os prezos alimentos, ano e medio subindo máis do 10 %

Os prezos dos alimentos e bebidas non alcohólicas subiron un 10,5 % interanual en setembro, taxa que se mantén respecto a agosto pero coa que este epígrafe acumula 18 meses crecendo a dobre díxito.

O prezo dos alimentos disparouse a principios de 2022, superando xa nese mes de abril o 10 % e chegando a marcar un alza récord do 16,6 % o pasado mes de febreiro.

De volta a setembro, as maiores subass interanuais dos prezos rexistráronse no aceite de oliva (67 %), o azucre (40,5 %), as patacas (20,5 %), o arroz (18,5 %) e os produtos de confeitería (18,2 %).

En concreto, o aceite de oliva encareceu un 136,6 % desde marzo de 2021, cando comezou a dispararse.

Pola contra, as maiores baixadas interanuais de prezos déronse na electricidade (38,3 %), outros aceites (32,7 %), o butano e propano (23,9 %), o gas natural (23,3 %) e o transporte combinado de pasaxeiros (15,4 %).